পঞ্চায়ত নিৰ্বাচনৰ দিন চমু চাপি অহাৰ লগে লগে ৰাজ্যৰ প্ৰভাৱশালী নেতাৰ মাজত আৰম্ভ হৈছে তীব্ৰ বাক্যবান। প্ৰাক্তন মন্ত্ৰী তথা কংগ্ৰেছী বিধায়ক ৰকিবুল হুছেইনে আজি নগাঁও জিলা কংগ্ৰেছৰ কাৰ্যালয়ত অনুষ্ঠিত এক সভাত অংশ লোৱাৰ পাছতে নাম উল্লেখ নকৰাকৈয়ে একালৰ সতীৰ্থ তথা বৰ্তমানৰ এগৰাকী প্ৰভাৱশালী মন্ত্ৰীক কটু ভাষাৰে সমালোচনা কৰে।
মন্ত্ৰী হিমন্ত বিশ্ব শৰ্মাক উদ্দেশ্যি ৰকিবুল হুছেইনে কয়, ‘তেওঁ কংগ্ৰেছত মুখ্য মন্ত্ৰী হ’বলৈ আশা পালি আছিল কিন্তু বিজেপিত গৈ হ’ল আদা বেপাৰী। এতিয়া ৰাইজে দেখি-শুনি সকলো বুজিছে আৰু তেওঁলোক ৰাইজৰ লগত নাই, তেওঁলোক কেৱল পুলিচ আৱেষ্টনীৰ মাজতহে থাকিব বিচাৰে’।
আনহাতে ৰাজ্যৰ ৰাজনৈতিক মহলত ধুমুহাৰ সৃষ্টি কৰা ৰাজেন গোঁহাইৰ নাৰী কেলেংকাৰি প্ৰসংগতো সৰৱ হোৱা দেখা গ’ল হুছেইনক। কেন্দ্ৰীয় ৰে’ল ৰাজ্য মন্ত্ৰী ৰাজেন গোহাঁইৰ নাৰী কেলেংকাৰিয়ে আগন্তুক পঞ্চায়ত নিৰ্বাচনত কংগ্ৰেছৰ ভোট বৃদ্ধি কৰিব, ইয়াৰ বিপৰীতে বৃহৎ ক্ষতি হ’ব বিজেপিৰ। বিজেপি আমাৰ হাতত ধৰাশায়ী হ’ব। আনকি কংগ্ৰেছে ভবাতকৈ বেছি ভোট লাভ কৰিব বুলি কংগ্ৰেছ নেতাগৰাকীয়ে উল্লেখ কৰে।
ইয়াৰ উপৰি শাসনাধিষ্ঠ বিজেপি-অগপ মিত্ৰতাধীন চৰকাৰখনে পঞ্চায়ত নিৰ্বাচন অনুষ্ঠিত কৰিব বিচৰা নাছিল বুলি উল্লেখ কৰি প্ৰাক্তন মন্ত্ৰীগৰাকীয়ে কয়- ‘পৰাজয় হোৱাৰ ভয়ত দল দুটাই মানুহৰ কাষ চাপিবলৈ ভয় খাইছিল। গুৱাহাটী উচ্চ ন্যায়ালয়ৰ কঠোৰ নিৰ্দেশনাৰ বাবেহে চৰকাৰে পঞ্চায়ত নিৰ্বাচন পাতিবলৈ বাধ্য হৈছে’।
প্ৰাক্তন মন্ত্ৰীজনে অগপ-বিজেপি আৰু এ আই য়ু ডি এফক একেটা মুদ্ৰাৰ ইপিঠি-সিপিঠি বুলি উল্লেখ কৰি কয়- ‘অগপ বিজেপিতকৈ বেছি প্ৰতাৰক। অগপ দলটোৱে জনসাধাৰণক বৰ্তমানলৈকে মিছা প্ৰতিশ্ৰুতিয়েই প্ৰদান কৰি আহিছে’।
উল্লেখ্য যে আজি নগাঁৱত বহুবল্কী নেতা ৰকিবুলে ৰাজ্যৰ নিৰ্বাচনী বতাহ গৰম কৰিলেও পৰৱৰ্তী সময়ত ৰকিবুলৰ বাক্যবানৰ প্ৰত্যুত্তৰ ৰাজেন গোঁহাই অথবা হিমন্ত বিশ্বই কিদৰে দিয়ে সেয়া হ’ব লক্ষ্যণীয়।
