মাত্ৰ দুমাহৰ ভিতৰতে দ্বিতীয়টো যৌন কেলেংকাৰিয়ে শিলচৰস্থিত অসম বিশ্ববিদ্যালয়ক কঁপাই গ’ল। এইবাৰ অভিযোগ উঠিল আৰবী বিভাগৰ ভাৰপ্ৰাপ্ত মুৰব্বী অধ্যাপক নাজমূল ইচলাম বৰভূঞাৰ বিৰুদ্ধে।
বিভাগটোৰ এগৰাকী ছাত্ৰীৰ এজাহাৰৰ ভিত্তিত ৪৬ বছৰীয়া অধ্যাপকজনক শিলচৰ আৰক্ষীয়ে আজি যোৱা নিশা ৩ বজাত তেওঁৰ ঘৰৰ পৰা গ্ৰেপ্তাৰ কৰে। ছাত্ৰীগৰাকীয়ে যোৱা ৩১ আগষ্টত এই এজাহাৰখন দাখিল কৰিছিল।
মন কৰিব লগীয়া কথাটো হ’ল ছাত্ৰীগৰাকীয়ে এজাহাৰখনত অভিযোগ কৰামতে, যোৱা ২ মে’তে তেওঁক মুৰব্বী অধ্যাপকজনে যৌন উৎপীড়ন কৰিছিল। অৰ্থাৎ এজাহাৰখন দাখিল কৰাৰ পৰা প্ৰায় ৪ মাহৰ পূৰ্বেই এই ঘটনাটো ঘটিছিল।
ছাত্ৰীগৰাকীয়ে অভিযোগ কৰামতে, তেওঁক মুৰব্বী অধ্যাপকজনে প্ৰথম ছিমেষ্টাৰত নামভৰ্তি কৰাৰ দিনৰ পৰাই টাৰ্গেট কৰি আছিল। অভিযোগমতে, সুযোগ লোৱাৰ উদ্দেশ্যেই প্ৰথম ছিমেষ্টাৰতে তেওঁক দুখনমান কাকতত ফেইল কৰাই ৰাখিছিল মুৰব্বী অধ্যাপকজনে। তাৰ পিছতে অধ্যাপকজনে তেওঁক তেওঁৰ উদ্দেশ্যত সহযোগ কৰাৰ বাবে সৈমান কৰাব খুজিছিল। তেওঁ সেইটো অব্যাহত ৰাখিছিল যোৱা ২ মে’ পৰ্য্যন্ত, যিদিনা যৌন উৎপীড়নৰ ঘটনাটো ঘটিছিল।
আনহাতে ছাত্ৰীগৰাকীৰ এই অভিযোগৰ বিপৰীতে অধ্যাপকজনৰ অধিবক্তা এ কে আজাদ লস্কৰে কয়, “এইটো বিশ্বাস কৰিবলৈ টান। যদি ২ মে’তে এনেকুৱা ঘটনা ঘটিছিল, আৰু তাৰ বিষয়ে অভিযোগ দিবলৈ ৩১ আগষ্টলৈ ৰ’ব লগীয়া হ’ল। ইয়াতে প্ৰমাণ হয় যে ঘটনাটো মনেসজা।”
ইফালে শিলচৰ থানাৰ পৰা আদালতলৈ নিয়া অৱস্থাত অভিযুক্ত অধ্যাপক মজমূল ইচলামেও কয় যে তেওঁৰ বিৰুদ্ধে বিভাগটোৰ ভিতৰতে ষড়যন্ত্ৰ চলিছে, আৰু এই ষড়যন্ত্ৰৰ অংশস্বৰূপে ছাত্ৰীগৰাকীৰ দ্বাৰা এনেকুৱা মিছা অভিযোগ উত্থাপন কৰাইছে।
জানিব পৰামতে বিশ্ববিদ্যালয়খনৰ ছাত্ৰ একতা সভালৈও ছাত্ৰীগৰাকীয়ে একেই অভিযোগেৰে পত্ৰ প্ৰেৰণ কৰিছে। ছাত্ৰ একতা সভাই তাৰ প্ৰতিলিপি দি উপাচাৰ্য্যক বিষয়টো চালি-জাৰি চাবলৈ অনুৰোধ জনাইছে।
ইফালে কাচাৰৰ আৰক্ষী অধীক্ষকে গোচৰটোৰ প্ৰাথমিক তদন্তৰ পিছত আৰক্ষীয়ে নজমূল ইচলামক গ্ৰেপ্তাৰ কৰা বুলি জানিবলৈ দি অধিক তদন্ত চলি আছে বুলি কয়।
উল্লেখযোগ্য যে ডেৰমাহৰ পূৰ্বে বিশ্ববিদ্যালয়খনৰ কৃষি ইঞ্জিনীয়াৰিঙৰ মুৰব্বী অধ্যাপক সুদীপ্ত সৰকাৰৰ বিৰুদ্ধেও বিভাগটোৰ চূড়ান্ত বৰ্ষৰ এগৰাকী ছাত্ৰীয়ে পৰীক্ষাত ভাল ফলৰ বিনিময়ত অধ্যাপকজনে তেওঁৰ যৌন স্পৃহাৰ প্ৰতি সঁহাৰি জনাবলৈ ছাত্ৰীগৰাকীক হাৰাশাস্তি কৰি অহাৰ অভিযোগ উত্থাপন কৰিছিল। পিছত সুদীপ্ত সৰকাৰক নিলম্বন কৰিছিল বিশ্ববিদ্যালয় কৰ্তৃপক্ষই।
মন কৰিব লগীয়া কথাটো হ’ল বিশ্ববিদ্যালয়খনত সঘনে যৌন কেলেংকাৰি সংঘটিত হৈ অহা কথাটোত ছাত্ৰ-ছাত্ৰীসমাজ বেচ উদ্বিগ্ন হৈ পৰাটোত।
