অসমৰ গাঁৱে-ভূঞে শৈক্ষিক সেৱা আগবঢ়াই থকা বিশ সহস্ৰাধিক শিক্ষক-শিক্ষয়িত্ৰী আৰু কৰ্মচাৰীৰ প্ৰতি কৰি অহা প্ৰৱঞ্চনাৰ প্ৰতিবাদত সোমবাৰে গুৱাহাটীৰ চচলত সদৌ অসম অপ্ৰাদেশিকীকৃত শিক্ষক সন্থাৰ নেতৃত্বত আৰম্ভ হোৱা আমৰণ অনশনৰ প্ৰতি ভাৰতৰ ছাত্ৰ ফেডাৰেছন (এছ এফ আই) আৰু ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে পূৰ্ণ সমৰ্থন জ্ঞাপন কৰিছে আৰু দাবীসমূহ পূৰণ কৰিবলৈ চৰকাৰৰ প্ৰতি আহ্বান জনাইছে।
দীৰ্ঘদিনে গণতান্ত্ৰিক আন্দোলন আৰু আৱেদন-নিবেদন কৰি অহাৰ পাছতো মুখ্যমন্ত্ৰী হিমন্ত বিশ্ব শৰ্মা আৰু অসম চৰকাৰে কৰি অহা বঞ্চনাৰ প্ৰতিবাদত শিক্ষকসকলে আমৰণ অনশনৰ দৰে প্ৰতিবাদী কাৰ্যসূচী গ্ৰহণ কৰিছে। এয়া এক উদ্বেগজনক আৰু পৰিতাপৰ বিষয় বুলি এছ এফ আই আৰু ডি ৱাই এফ আইয়ে উল্লেখ কৰি ইয়াৰ বাবে মুখ্যমন্ত্ৰীকে জগৰীয়া কৰিছে।
সোমবাৰে চচলৰ আন্দোলনস্থলীলৈ গৈ এছ এফ আইৰ ৰাজ্যিক সম্পাদক সংগীতা দাস আৰু ডি ৱাই এফ আইৰ ৰাজ্যিক সম্পাদক ৰিতু ৰঞ্জন দাসে শিক্ষকসকলৰ দাবীৰ প্ৰতি পূৰ্ণ সমৰ্থন জ্ঞাপন কৰে। দুয়োটা সংগঠনে পূৰ্ণ সমৰ্থন জ্ঞাপন কৰি শিক্ষকসকলৰ সন্মুখত বক্তব্য দাঙি ধৰে আৰু শিক্ষকসকলৰ নায্য দাবীসমূহ পূৰণৰ বাবে ব্যৱস্থা ল’বলৈ চৰকাৰৰ ওচৰত দাবী উত্থাপন কৰে।
এছ এফ আই আৰু ডি ৱাই এফ আইয়ে শেহতীয়াকৈ অপ্ৰাদেশিকীকৃত শিক্ষানুষ্ঠানৰ ছাত্ৰ-ছাত্ৰীৰ প্ৰতি মধ্যাহ্ন ভোজনৰ লগতে অন্যান্য সা-সুবিধা কৰ্তন কৰা কাৰ্যক তীব্ৰ ভাষাৰে নিন্দা কৰে আৰু এয়া অমানৱীয় আৰু সংবিধান বিৰোধী বুলি আভিহিত কৰে।
সংগঠন দুটাৰ নেতাদ্বয়ে অসমৰ শৈক্ষিক বিকাশৰ স্বাৰ্থত শিক্ষকসকলৰ দাবীৰ প্ৰতি সমৰ্থন জ্ঞাপন কৰিবলৈ অসমৰ ছাত্ৰ-যুৱ সংগঠনৰ লগতে ৰাইজলৈ আহ্বান জনায়।
