পাকিস্তানৰ প্ৰাক্তন অধিনায়ক ইনজামাম উল হকক যোগ্য প্ৰত্যুত্তৰ দিছে ক্ষুব্ধ ভাৰতৰ অভিজ্ঞ বেগী বলাৰ মহম্মদ ছামীয়ে। দৰাচলতে পাকিস্তানৰ প্ৰাক্তন অধিনায়ক ইনজামাম উল হকে ২০২৪ ৰ টি-২০ বিশ্বকাপৰ সময়ত টিম ইণ্ডিয়াই বল টেম্পাৰিং কৰাৰ অভিযোগ উত্থাপন কৰিছিল। এইবাৰ মহম্মদ ছামীয়ে সেই বিষয়টোক লৈ উভতি ধৰিছে।
কিন্তু এইটোৱে প্ৰথম নহয়, ইয়াৰ পূৰ্বেও বহু প্ৰাক্তন পাকিস্তানী খেলুৱৈয়ে এনে সোপাঢিলা মন্তব্য কৰিছে। এদিনীয়া বিশ্বকাপৰ সময়ত পাকিস্তানৰ প্ৰাক্তন ক্ৰিকেটাৰসকলে উত্থাপন কৰা অভিযোগকো মহম্মদ ছামীয়ে খাৰিজ কৰে।
দৰাচলতে এদিনীয়া বিশ্বকাপত মহম্মদ ছামীয়ে একেৰাহে ইখনৰ পিছত সিখন মেচত উইকেট দখল কৰাৰ পাছত পাকিস্তানৰ প্ৰাক্তন খেলুৱৈসকলে দাবী কৰিছিল যে ভাৰতীয় দলটোৱে বলিং কৰি থকাৰ সময়ত বলত বিশেষ মাইক্ৰ’চিপ সুমুৱাই দিছিল যাৰ ফলত টিম ইণ্ডিয়া উপকৃত হৈছিল।
ভাৰতীয় দলৰ বেগী বলাৰ মহম্মদ ছামীয়ে শুভংকৰ মিশ্ৰৰ ইউটিউব চেনেলত আহি এই সকলোবোৰ বিষয়ৰ ওপৰত মুকলিকৈ কৈছে। তেওঁ কয় যে ‘’পাকিস্তানীসকল আমাক লৈ কেতিয়াও সুখী হোৱা নাছিল আৰু কেতিয়াও নহ’বও। কোনোবাই কয় আমাক বেলেগ এটা বল দিয়া হৈছে, কোনোবাই কয় বলত চিপ আছে। মই আগতেও কৈছো যে ভৱিষ্যতে যদি ক’ৰবাত সুযোগ পাওঁ তেন্তে মই বলটো খুলি ভিতৰত কিবা যন্ত্ৰ আছে নেকি দেখুৱাব বিচাৰো। যদি তেওঁলোকৰ বলাৰজনে বলটো ছুইং বা ৰিভাৰ্ছ ছুইং কৰে তেন্তে সেয়া দক্ষতা আৰু আমি যদি কৰোঁ তেন্তে আমি বলটো টেম্পাৰিং কৰিছো আৰু বলটোৰ ভিতৰত চিপ এটা লগাই দিছো।’’
টি-২০ বিশ্বকাপৰ সময়ত ইনজামাম-উল হকে কৈছিল, ‘যেতিয়া অৰ্শদীপ সিঙে ১৫ নং অভাৰত বল কৰিছিল, তেতিয়া বলটো ৰিভাৰ্ছ ছুইং কৰিছিল। নতুন বল এটাৰে ইমান বেগেৰে ৰিভাৰ্ছ ছুইং কৰাটো কঠিন। অৰ্থাৎ ১২-১৩ অভাৰত বলটোত কিবা কৰা হৈছিল। কাৰণ যেতিয়া তেওঁ ১৫ নং অভাৰত বলিং কৰিবলৈ আহিছিল তেতিয়া তেওঁৰ ৰিভাৰ্ছ ছুইং আৰম্ভ হৈছিল। গতিকে ইয়াতো আম্পায়াৰসকলে চকু মেলি ৰাখিব লাগে।‘
ইনজামাম-উল-হকৰ যুক্তিৰ বিপৰীতে মহম্মদ ছামীয়ে লগতে কয়, ‘তেওঁলোকৰ বিৰুদ্ধে যিটো দলে ভাল প্ৰদৰ্শন কৰে, তেওঁলোকেই তাত টাৰ্গেট হৈ পৰে। ধৰি লওক মই ডিভাইচটোৰ মাজেৰে এটা বল দিলোঁ আৰু বলটো ওলোটাকৈ হেঁচা মাৰি ধৰো। মই ইনছুইং বল কৰিলোঁ আৰু যদি আউটছুইং হ’লহেঁতেন তেন্তে চাৰি হ’লহেঁতেন।’
মহম্মদ ছামীয়ে লগতে কয়, ‘প্ৰাক্তন খেলুৱৈ হোৱাৰ পিছতো আপুনি এনেকুৱা কথা ক’ব পাৰে বুলি মই আশা নকৰো। আনকি ৱাছিম আক্ৰমেও কৈছিল যে আম্পায়াৰসকলে যেনেকৈ বল দিয়ে আৰু তাত কোনো যন্ত্ৰ লগোৱা সম্ভৱ নহয়। এই ধৰণৰ কাৰ্টুনগিৰি ভাল নহয়। এই বক্তব্যবোৰ মানুহক মুৰ্খ বনাবৰ বাবে দিয়া হয়।‘
