সমগ্ৰ বিশ্বৰ ক্ৰিকেট অনুৰাগীক স্তম্ভিত কৰি তুলি আজি অষ্ট্ৰেলিয়াৰ কিংবদন্তি স্পীনাৰ শ্বেন ৱাৰ্ণৰ মৃত্যু হয়। মৃত্যুৰ সময়ত তেওঁৰ বয়স হৈছিল মাত্ৰ ৫২বছৰ।
শ্বেন ৱাৰ্ণৰ সংস্থাৰ তৰফৰ পৰা কিংবদন্তি লেগ স্পীনাৰ গৰাকীৰ মৃত্যুৰ খবৰ জনোৱা হয়।হৃদৰোগত আক্ৰান্ত হৈ শ্বেন ৱাৰ্ণৰ মৃত্যু হোৱা বুলি কোৱা হৈছে।
লগতে পঢ়ক: যুদ্ধৰ আঁৰৰ খবৰ: ইউক্ৰেইনৰ ১৮হাজাৰ শৰণাৰ্থীয়ে আশ্ৰয় লৈছে জাৰ্মানীত
মৃত্যু হোৱাৰ সময়ত শ্বেন ৱাৰ্ণ থাইলেণ্ডত আছিল।
উল্লেখ্য যে আজি পুৱাই অষ্ট্ৰেলিয়াৰ আন এগৰাকী কিংবদন্তি ক্ৰিকেটাৰ ৰড মাৰ্শ্বৰ মৃত্যু হৈছিল। তাৰপিছতে শ্বেন ৱাৰ্ণ আকস্মিক মৃত্যুৰ খবৰে এতিয়া সমগ্ৰ বিশ্বৰ ক্ৰিকেট মহলক শোকস্তব্ধ কৰি তুলিছে।
শ্বেন ৱাৰ্ণৰ জন্ম হৈছিল ১৯৬৯ চনৰ ১৩ ছেপ্টেম্বৰত।
ক্ৰিকেট ইতিহাসৰ অন্যতম শ্ৰেষ্ঠ বলাৰ হিচাপে বিবেচিত হোৱা ৱাৰ্ণক ১৯৯৪ চনত ৱিজডেন ক্ৰিকেটাৰ অফ দা ইয়েৰৰ সন্মানেৰে সন্মানিত কৰা হৈছিল।
তেওঁ ১৯৯৭ চনত ৱিজডেন লিডিং ক্ৰিকেটাৰ ইন দা ৱৰ্ল্ড (নেছনেল উইনাৰ) আছিল।
নিষিদ্ধ ড্ৰাগছ গ্ৰহণৰ বাবে ২০০৩ চনত তেওঁক খেলৰ পৰা নিষিদ্ধ কৰা হৈছিল।
২০২০ চনত ক্ৰিকেট বিশেষজ্ঞৰ এটা পেনেলে তেওঁক শতিকাৰ পাঁচজন ‘উইজডেন ক্ৰিকেটাৰ’ৰ ভিতৰত এজন হিচাপে নিৰ্বাচিত কৰিছিল।
তেওঁ ২০১৩ চনৰ জুলাইত ক্ৰিকেটৰ পৰা আনুষ্ঠানিকভাৱে অৱসৰ লৈছিল।
আন্তঃৰাষ্ট্ৰীয় পৰ্যায়ত খেলাৰ লগতে ৱাৰ্ণে নিজৰ গৃহ ৰাজ্য ভিক্টোৰিয়াৰ হৈ ঘৰুৱা ক্ৰিকেট আৰু হেম্পশায়াৰৰ হৈ ইংলিছ ঘৰুৱা ক্ৰিকেট খেলিছিল। তেওঁ হেম্পশায়াৰ দলৰ অধিনায়ক আছিল ।
ৱাৰ্ণে ১৯৯২ চনত তেওঁৰ প্ৰথম খন টেষ্ট মেচ খেলিছিল আৰু ১,০০০ তকৈও অধিক আন্তঃৰাষ্ট্ৰীয় উইকেট (টেষ্ট আৰু এদিনীয়া আন্তৰ্জাতিক খেলত) দখল কৰিবলৈ সক্ষম হৈছিল।
২০০৭ চনৰ জানুৱাৰীত ইংলেণ্ডৰ বিৰুদ্ধে অষ্ট্ৰেলিয়াৰ ৫-০ এছেজ শৃংখলা বিজয়ৰ পিছত তেওঁ আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰাৰ কথা ঘোষণা কৰিছিল।
সেই সময়ত অষ্ট্ৰেলিয়ান দলৰ অবিচ্ছেদ্য আন তিনিজন খেলুৱৈ- গ্লেন মেকগ্ৰা, ডেমিয়েন মাৰ্টিন আৰু জাষ্টিন লেংগাৰেও একে সময়তে টেষ্টৰ পৰা অৱসৰ গ্ৰহণ কৰিছিল।
২০০৮ চনৰ মাৰ্চৰ শেষৰ ফালে তেওঁ প্ৰথম শ্ৰেণীৰ ক্ৰিকেট খেলৰ পৰা অৱসৰ লোৱাৰ কথা ঘোষণা কৰে।
তেওঁ ৰাজস্থান ৰয়েলছৰ হৈ ইণ্ডিয়ান প্ৰিমিয়াৰ লীগৰ প্ৰথম চাৰিটা ছিজনত (২০০৮-২০১১) খেলিছিল।
দলটোত তেওঁ অধিনায়ক আৰু প্ৰশিক্ষক উভয়ৰে ভূমিকা পালন কৰিছিল।
