বলীউড জগতৰ তাৰকা শিল্পী সকলৰ লগত বিভিন্ন জনে শিশু অভিনেতা বা শিশু অভিনেত্ৰী হিচাপে কাম কৰিছে। বলিউডৰ জগতত প্ৰৱেশ কৰিবলৈ বহুতেই কম বয়সতে শিশু অভিনেতা হিচাপে কাম কৰিবলৈ ভিৰ কৰে।
বিখ্যাত অভিনেতা-অভিনেত্ৰীৰ লগত অভিনয় কৰি সমানে সমানে জনপ্ৰিয়তা অৰ্জন কৰিবলৈ সক্ষম হৈছে বহু শিশু অভিনেতা-অভিনেত্ৰী। তেনে এগৰাকী অভিনেত্ৰী হৈছে ঝাণক শুক্লা।
‘কল হো না হো’ চিনেমাখন মনত আছেনে? ২০০৩ চনত শ্বাহৰুখ খান, প্ৰীতি জিন্তা, ছাইফ আলী খান অভিনীত ছবিখনে বক্স অফিচত ধুমুহাৰ সৃষ্টি কৰিছিল। এই ছবিখনে শ্বাহৰুখৰ কেৰিয়াক এক অন্য মাত্ৰা প্ৰদান কৰাৰ লগতে ছবিখনে বলীউডৰ জনপ্ৰিয় ছবিৰ তালিকাতো স্থান দখল কৰিছিল।
এই ছবিখনত প্ৰীতিৰ কনিষ্ঠ ভগ্নী জিয়াৰ চৰিত্ৰত অভিনয় কৰিছিল ঝাণক শুক্লাই। ছবিখনত শ্বাহৰুখ আৰু প্ৰীতিতকৈও বেছিকৈ দৰ্শকৰ দৃষ্টি আকৰ্ষণ কৰিছিল মৰমলগা ছোৱালীজনীয়ে।
পিতৃ-মাতৃ অভিনয় জগতখনৰ সৈতে জড়িত হোৱাৰ বাবে ঝাণকেও সৰুৰে পৰাই অভিনয় জগতৰ প্ৰতি আকৃষ্ট হৈছিল। ডাঙৰ পৰ্দাত প্ৰৱেশ কৰাৰ আগতে ঝাণকক এটি বিজ্ঞাপনতো দেখা পোৱা গৈছিল। সেই বয়সত তেওঁৰ অভিনয় ইমানেই ভাল আছিল যে বিজ্ঞাপনৰ ছবিখনে বছৰৰ শ্ৰেষ্ঠ বিজ্ঞাপন ছবিৰ বঁটা লাভ কৰিছিল। ইয়াৰ উপৰি টেলিভিশ্যনৰ ধাৰাবাহিকতো অভিনয় কৰিছে ঝাণকে।
ইয়াৰ পিছতেই শ্বাহৰুখ আৰু প্ৰীতিৰ সৈতে অভিনয় কৰাৰ উপৰিও ঝাণকে হলিউডৰ এখন ছবিৰ বাবেও অফাৰ লাভ কৰিছিল। অৱশ্যে সেই ছবিখনত তেওঁ অভিনয় কৰা নাছিল। আচলতে সেই সময়ত ঝাংকৰ পিতৃ-মাতৃয়ে বিচাৰিছিল যে তাই প্ৰথমে পঢ়া-শুনা শেষ কৰক, তাৰ পিছত অভিনয় জগতত মনোনিৱেশ কৰক।
মাক-দেউতাকৰ কথা ৰাখিবলৈ ঝাণক পঢ়া-শুনাত ব্যস্ত হৈ পৰিল। তেওঁ পুৰাতত্ত্ব বিভাগৰ পৰা স্নাতকোত্তৰ ডিগ্ৰী সম্পন্ন কৰিলে। কিন্তু শিক্ষা শেষ কৰি অভিনয় জগতলৈ পুনৰ ঘূৰি নাহিল ঝাণক।
এতিয়া তেওঁ সম্পূৰ্ণ বেলেগ পথত। বিজনেছ এডমিনিষ্ট্ৰেচনত স্নাতকোত্তৰ ডিগ্ৰী লাভ কৰাৰ লগতে ঝাণকে নিজাকৈ চাবোন নিৰ্মাণৰ ব্যৱসায় আৰম্ভ কৰিছে। ঝাণক ডাঙৰ হৈ সম্পূৰ্ণ সলনি হৈছে। অতীত আৰু বৰ্তমানৰ মাজত কোনো সাদৃশ্য নাই। বহুতেই প্ৰশ্ন কৰে, পুনৰ অভিনয় জগতলৈ ঘূৰি আহিবনে ঝাণক ?
