মুখ থেকেচা বিজেপিৰ! শেষ হাঁহি আপৰ, দিল্লীয়ে পালে প্ৰথম মহিলা মেয়ৰ
বিজেপিৰ সকলো ষড়যন্ত্ৰ ওফৰাই অৱশেষত দিল্লী পৌৰ নিগমৰ মেয়ৰ নিৰ্বাচনত আম আদমি পাৰ্টিয়ে শেষ হাঁহি মাৰিলে। বুধবাৰে আপৰ প্ৰাৰ্থী শ্বেলী অ’বেৰয়ে বিজেপিৰ প্ৰাৰ্থী ৰেখা গুপ্তাক পৰাস্ত কৰি মেয়ৰ ৰূপে নিৰ্বাচিত হৈছে।
বুধবাৰে ডাঃ এছ পি মুখাৰ্জী চিভিক চেণ্টাৰত অনুষ্ঠিত হোৱা মেয়ৰ নিৰ্বাচনত আপৰ প্ৰাৰ্থী শ্বেলী অ’বেৰয়ে বিজেপিৰ প্ৰাৰ্থী ৰেখা গুপ্তাক ৩৪ টা ভোটৰ ব্যৱধানত পৰাস্ত কৰে। আপৰ প্ৰাৰ্থীয়ে শ্বেলী অ’বেৰয়ে ১৫০ টা ভোট লাভ কৰাৰ বিপৰীতে বিজেপি প্ৰাৰ্থী ৰেখা গুপ্তাই ১১৬ টা ভোট লাভ কৰে।
উল্লেখ্য, যোৱা ডিচেম্বৰত অনুষ্ঠিত এম চি ডিৰ নিৰ্বাচনত ২৫০ খন আসনৰ ভিতৰত ১৩৪ খন আসনত জয়ী হৈ আপে ১৫ বছৰৰ পাছত বিজেপিক উৎখাত কৰে। কিন্তু মেয়ৰ নিৰ্বাচন কেন্দ্ৰক কৰি বিজেপি আৰু আপৰ মাজত সংঘাতৰ সূত্ৰপাত ঘটে। বিশেষকৈ বিজেপিয়ে উপ ৰাজ্যপালৰ দ্বাৰা মনোনীত প্ৰাৰ্থীসকলক মেয়ৰ নিৰ্বাচনত অংশগ্ৰহণ কৰি ভোট দান কৰোৱাই বিজেপিৰ প্ৰাৰ্থীগৰাকীৰ বিজয় সুনিশ্চিত কৰিবলৈ ষড়যন্ত্ৰ কৰা বুলি অভিযোগ উত্থাপন কৰে আপে।
আপে বিজেপিৰ এই প্ৰচেষ্টাক অসাংবিধানিক আখ্যা দি বিৰোধিতা কৰিবলৈ ধৰে। এই বিবাদৰ বাবেই ২০১৩ চনৰ ৬, ২৪ জানুৱাৰী আৰু ৬ ফেব্ৰুৱাৰীত তিনিবাৰকৈ অনুষ্ঠিত কৰিবলৈ লোৱা মেয়ৰ নিৰ্বাচন সম্পন্ন কৰিব পৰা নগ’ল।
অৱশেষত বিজেপিৰ এই ষড়যন্ত্ৰ বিৰুদ্ধে আপ উচ্চতম ন্যায়লয়ৰ দ্বাৰস্থ হয়। যোৱা ১৭ ফেব্ৰুৱাৰীত উচ্চতম ন্যায়ালয়ে উপ ৰাজ্যপালৰ দ্বাৰা মনোনীত প্ৰাৰ্থীয়ে ভোটদান কৰিব নোৱাৰে স্পষ্ট নিৰ্দেশ দি ২৪ ঘণ্টাৰ ভিতৰত মেয়ৰৰ নিৰ্বাচন অনুষ্ঠিত কৰিবলৈ জাননী জাৰি কৰে।
এই নিৰ্দেশৰ পাছতে বুধবাৰে দিল্লী পৌৰ নিগমৰ মেয়ৰ নিৰ্বাচন অনুষ্ঠিত কৰা হয় আৰু বিজেপিৰ সকলো প্ৰচেষ্টা আৰু ষড়যন্ত্ৰ বানচাল কৰি আপৰ প্ৰাৰ্থীয়ে বিজয় সাব্যস্ত কৰে। লগতে দিল্লীয়ে প্ৰথমগৰাকী মহিলা মেয়ৰৰূপে শ্বেলী অ’বেৰয়ক লাভ কৰে।