নামমাত্ৰ আশ্ৰয়ৰ বাবে বাটকুৰি বাই ফুৰা শতায়ু গৰকা এগৰাকী বৃদ্ধৰ কাহিনীয়ে সাধাৰণ জনতাক ভীতিগ্ৰস্ত কৰি তোলাৰ সময়তে নগাওঁ জিলা আইন সেৱা প্ৰাধিকৰণে বৃদ্ধাগৰাকীৰ দায়িত্ব লৈছে। আত্মীয়-স্বজনৰপৰা নিৰ্যাতিত হৈ আশ্ৰয়হীন হোৱা এই লোকজনৰ নাম গোলোক ডেকা।
জানিব পৰা মতে, মৰিগাৱঁৰ মিকিৰভেটাৰ লুঙামুখৰ এই গোলোক ডেকা নামৰ অবিবাহিত বৃদ্ধজনক ভতিজাকহঁতে অত্যাচাৰ কৰি ঘৰৰ পৰা উলিয়াই দিছিল আৰু ৰহাৰ কামগাৱঁৰ এটা মনসা মন্দিৰত ভাগিনীয়েকে আনি এৰি থৈ গৈছিল।
ইপিনে, দুদিনৰ পিছত বৃদ্ধগৰাকীক আত্মীয়সকলে লৈ যাব বুলি কৈছিল যদিও, তেওঁক নিবলৈ নহাত মনসা মন্দিৰটোৰ গৰাকী খগেন ডেকাই তেখেতক আশ্ৰয় দিছিল। তাৰপিছত খগেন ডেকাই বৃদ্ধগৰাকীৰ পৰিয়ালৰ লগত যোগাযোগ কৰে যদিও পৰিয়ালৰ লোকে ওলোটাই খগেন ডেকাক ককৰ্থনা কৰি গোলাক ডেকাক বেলেগ ঠাইলৈ পঠিয়াই দিবলৈ কৈছিল।
ইয়াৰ পাছতে খগেন ডেকা আৰু তেওঁৰ পত্নীয়ে ৰুগীয়া বৃদ্ধগৰাকীক শুশ্ৰুষা কৰি সুস্থ কৰি প্ৰায় চাৰি মাহ নিজৰ ঘৰতেই আশ্ৰয় দিয়ে। ইতিমধ্যে বিভিন্ন সংবাদ মাধ্যমত বৃদ্ধ লোকজনৰ বাতৰি প্ৰকাশ পাইছে। বৃদ্ধ বয়সত গোলোক ডেকাৰ এনে কৰুণ কাহিনীৰ খবৰ লাভ কৰি তেওঁক সহায় কৰিবলৈ নগাওঁ জিলা আইন সেৱা প্ৰাধিকৰণ আগুৱাই আহে।
উল্লেখ্য যে, আজি প্ৰাধিকৰণৰ হৈ অধিবক্তা ৰূপালী গোস্বামী আৰু চেহনাজ চুলতানাই ৰহা আৰক্ষীৰ সহযোগত বৃদ্ধগৰাকীক আইন সেৱা প্ৰাধিকৰণৰ তত্বাৱধানলৈ আনে।
আনহাতে, আইন সেৱা প্ৰাধিকাৰীয়ে নগাঁও জিলাৰ গ্ৰাম বিকাশ পৰিষদত থকা বৃদ্ধা আশ্ৰমত ৰাখিছে।
