সংসদীয় নিৰ্বাচনত লিবাৰেল ডেম’ক্ৰেটিক পাৰ্টীৰ (LDP) শোচনীয় পৰাজয়ৰ পাছতে দলৰ ভিতৰত তীব্ৰ চাপৰ সন্মুখীন হোৱাত জাপানৰ প্ৰধানমন্ত্ৰী শ্বিগেৰু ইছিবাই পদত্যাগৰ সিদ্ধান্ত লৈছে। দলটোৰ বিভাজন ৰোধ কৰিবলৈ এই পদক্ষেপ গ্ৰহণ কৰা বুলি জাপানৰ ৰাজহুৱা টেলিভিছন এন এইচ কে সংবাদ মাধ্যময়ে নিশ্চিত কৰিছে।
ইছিবাই, জুলাই মাহত হোৱা সংসদীয় নিৰ্বাচনত শাসকীয় জোঁটে উচ্চ সদনত ২৪৮ আসনৰ সংখ্যাগৰিষ্ঠতা লাভ কৰাত ব্যৰ্থ হোৱা বাবে অধিক দুৰ্বল হৈ পৰে। ফলত দলৰ ভিতৰত সোঁপন্থী আৰু বিৰোধী গোটৰ পৰা তেওঁৰ পদত্যাগৰ দাবী তীব্ৰ হয়।
শনিবাৰে প্ৰাক্তন প্ৰধানমন্ত্ৰী যোছিহিদে ছুগা আৰু কৃষিমন্ত্ৰী শ্বিনজিৰো ক’ইজুমিৰ সৈতে হোৱা বৈঠকৰ পিছতে ইছিবাই পদত্যাগৰ সিদ্ধান্ত লৈছে। সোমবাৰে অনুষ্ঠিত হ’ব লগা নেতৃত্বৰ নিৰ্বাচনৰ আগতেই তেওঁ এই পদক্ষেপ গ্ৰহণ কৰে। নতুবা তেওঁৰ বিৰুদ্ধে অনাস্থা প্ৰস্তাৱ আনি পাৰ্টীৰ ভিতৰত বিভাজন গভীৰ হোৱাৰ আশংকা আছিল।
উল্লেখযোগ্য যে, একে সময়তে জাপান আমেৰিকাৰ শুল্ক নীতি, আৰ্থিক সংকট, মূল্যবৃদ্ধি, কৃষি নীতিৰ সংস্কাৰ আৰু অঞ্চলজুৰি ক্ৰমবর্ধমান উত্তেজনা আদি গুৰুত্বপূৰ্ণ প্ৰত্যাহ্বানৰ সন্মুখীন হৈছে। এনে পৰিস্থিতিত প্ৰধানমন্ত্ৰীৰ পদত্যাগে ৰাজনৈতিক শূন্যতাৰ সৃষ্টি কৰিব পাৰে বুলি বিশ্লেষকসকলে আশংকা প্ৰকাশ কৰিছে।
