অসম-অৰুণাচল সীমান্তত ধেমাজিৰ মাজুলীপুৰ অঞ্চলত পথ নিৰ্মাণক লৈ বিগত কেইদিন ধৰি তীব্ৰ উত্তেজনা চলি আছে। অৰুণাচল প্ৰশাসনে সীমান্তত আৰম্ভ কৰা পথ নিৰ্মাণৰ কামত বাধা দিয়াৰ পিছতে পৰিস্থিতি অধিক জটিল হৈ পৰে। অবশেষত জোনাই প্ৰশাসন অৰুণাচল প্ৰশাসনৰ চাপৰ সন্মুখীন হৈ পথ নিৰ্মাণৰ কাম বন্ধ ৰাখিবলৈ বাধ্য হয়। সীমান্ত আৰক্ষী চকী থকাৰ পাছতো নিজৰ ভূমিত পথ নিৰ্মাণ কৰিবলৈ দিয়া হোৱা নাই বুলি অভিযোগ উঠিছে।
এই উত্তেজনাৰ মূল সূত্র আছিল অসমৰ লাইমেকুৰীৰ বৈকুণ্ঠপুৰ ৫১৫ নং ৰাষ্ট্ৰীয় ঘাইপথৰ পৰা অৰুণাচলৰ নাৰি সংযোগী পথ। জোনাই প্ৰশাসনৰ নিৰ্দেশত অসমৰ ঠিকাদাৰে সীমান্তৰ ভিতৰত প্ৰায় ৩৬০ মিটাৰ অঞ্চলত পথ নিৰ্মাণ আৰম্ভ কৰিছিল। কিন্তু অৰুণাচলবাসীয়ে সেই ভূমি নিজৰ বুলি দাবী কৰি কাম বন্ধ কৰায়। প্ৰশাসনিক আলোচনাৰ অন্তত পুনৰ অনুমতি লাভ কৰে যদিও, সন্ধিয়াৰ পৰাই পুনৰ অৰুণাচলৰ লোক আৰু বিষয়াসকলে উপস্থিত হৈ পথ নিৰ্মাণ বন্ধ কৰে।
শনিবাৰে পুৱাই সীমান্তৱৰ্তী ৰাইজে লাইমেকুৰীত সভা পাতি স্পষ্ট ভাষাত কয় “অসমৰ মাটি একো এৰি দিয়া নহ’ব, উন্নয়ন হ’বই লাগিব।” ৰাইজৰ দাবীৰ ভিত্তিত দিনৰ ১২ বজাৰ পৰা পুনৰ পথ নিৰ্মাণ আৰম্ভ হয়। প্ৰায় দুঘণ্টা ধৰি কাম চলি থকা অৱস্থাতে অৰুণাচল প্ৰশাসনে আকৌ বাধা দিয়ে আৰু কাম বন্ধ কৰায়।
ইয়াৰ পিছত জোনাই উপজিলা প্ৰশাসন আৰু অৰুণাচলৰ নাৰি মহকুমা প্ৰশাসন সীমান্ত আৰক্ষী চকীত যুটীয়া সভাত বহে। সেই সভাত অৰুণাচল প্ৰশাসনে স্পষ্ট কৰে যে“অসম-অৰুণাচল সীমা চৰকাৰী পৰ্যায়ত চূড়ান্ত নকৰালৈকে এই বিতৰ্কিত ভূমিত পথ নিৰ্মাণৰ কাম একেবাৰে নহ’ব।”
অৰুণাচলৰ এই কঠোৰ ভূমিকা আৰু জোনাই প্ৰশাসনৰ নীৰৱতাই স্থানীয় ৰাইজক শংকিত কৰি তুলিছে। সংবাদ মাধ্যমৰ সন্মুখতো প্ৰশাসনে কোনো প্ৰতিক্ৰিয়া নজনোৱাত ক্ষোভ প্ৰকাশ কৰিছে ৰাইজে। তেওঁলোকে জনোৱা মতে “১৯৭২ চনত ইয়াত সীমান্ত আৰক্ষী চকী স্থাপন কৰা হৈছিল। সেই সময়ৰ পৰাই এই ভূমি অসমৰ। তেতিয়াৰে পৰা চৰকাৰী আঁচনি আৰু পথ নিৰ্মাণ অসমে কৰি আহিছে।”
তেওঁলোকৰ অভিযোগ কৰিছে যে চৰকাৰে সীমান্ত-বিবাদ সমাধানৰ নামত মিচা মাতি আহিছে। মুখ্যমন্ত্ৰী-মন্ত্ৰী, বিধায়কৰ বৈঠক, আন্তঃৰাজ্য বুজাবুজি এই সকলোবোৰ ৰাইজৰ চকুত ধূলি দিয়াৰ সমান। বাস্তৱ ক্ষেত্ৰত সীমান্তত একেবাৰে বিপৰীত ছবি দেখা গৈছে। মেঘালয়, নাগালেণ্ড বা অৰুণাচল য’তে সীমা-বিবাদ আছে, সকলোত একেই দৃশ্য। ইফালে পথটোৰ কাম আধৰুৱা হৈ পৰাত বালি নপৰাৰ বাবে শিলৰ ওপৰতে বাহন চলিব লগা হৈছে।
