আকৌ ডাঙৰ পৰ্দালৈ আহি আছে শিল্পা শ্বেট্টী। তেওঁৰ শেষৰখন মুক্তি পোৱা ছবি ‘নিকম্মা’ই বক্স অফিচত বিশেষ সঁহাৰি নাপালে। অৱশ্যে তেওঁৰ পৰৱৰ্তী ছবি ‘সুখী’ক লৈ আশাবাদী হৈ পৰিছে শিল্পা। শেহতীয়াকৈ মুম্বাইৰ মাল্টিপ্লেক্সত অনুষ্ঠিত হোৱা ট্ৰেইলাৰ মুক্তিৰ অনুষ্ঠানত শিল্পাই ছবিখনৰ সবিশেষ সাংবাদিকক জনায়।
সংগীতৰ তালে তালে ভাংৰা নৃত্য কৰি ‘সুখী’ৰ ট্ৰেইলাৰ মুক্তি অনুষ্ঠানত প্ৰৱেশ কৰে শিল্পাই। সুখীত আদবয়সীয়া ভাৰতীয় গৃহিণী হিচাপে দেখা যাব অভিনেত্ৰীগৰাকীক। দৈনন্দিন জীৱনৰ পৰা পলায়ন কৰিব বিচৰা এগৰাকী মহিলা হিচাপে পৰ্দাত দেখা যাব শিল্পাক। শিল্পাই কয় যে প্ৰথম অৱস্থাত তেওঁ ছবিখন কৰিবলৈ ৰাজি নাছিল।
![](https://assam.nenow.in/wp-content/uploads/2023/09/WhatsApp-Image-2023-09-12-at-10.42.26-AM-300x169.jpeg)
তেওঁ কয়, ‘যেতিয়া শিখা শৰ্মা আৰু বিক্ৰম মালহোত্ৰাই প্ৰথম এই ছবিখনৰ বাবে মোৰ কাষ চাপিছিল, তেতিয়া মই তেওঁলোকক আন কোনোবাক কাষ্ট কৰিবলৈ পৰামৰ্শ দিছিলো। মই নিজেই তেওঁলোকক চাৰি-পাঁচগৰাকী অভিনেত্ৰীৰ নাম দিলোঁ; কিন্তু শিখা আৰু বিক্ৰমে মোৰ লগতহে এই ছবিখন বনাব বিচাৰে। তেতিয়া মোৰ মনত আন কিবা এটা চলি আছিল। এই ছবিখনৰ বাবে মই একেবাৰেই প্ৰস্তুত নাছিলোঁ।‘’
![](https://assam.nenow.in/wp-content/uploads/2023/09/SHILPA-300x200.jpg)
প্ৰস্তাৱ লাভ কৰাৰ আঠ মাহৰ পাছত শিল্পাই ‘সুখী’ ছবিখন কৰিবলৈ সন্মত হয়। তেওঁ কয়, ‘মই ক’ৰবালৈ গৈছিলোঁ, তাৰ পিছতে মোৰ স্বামীৰ ফোন আহিল৷ তেওঁ ফোনত কয়, “তুমি পাগল নেকি, এই ছবিখন এৰি দিবা?” আচলতে এই ছবিখনৰ চিত্ৰনাট্য বহুদিন টেবুলত পৰি আছিল। ঘৰৰ বাহিৰত থাকোঁতে ৰাজে চিত্ৰনাট্য পঢ়িলে। এই ছবিখনৰ কাহিনী তেওঁ ভাল পাইছিল। ৰাজৰ পৰামৰ্শ মতে মই ছবিখন কৰিবলৈ মান্তি হ’লোঁ।‘
![](https://assam.nenow.in/wp-content/uploads/2023/09/WhatsApp-Image-2023-09-12-at-10.41.47-AM-300x169.jpeg)
সুখী ছবিত নিজৰ ভূমিকা সন্দৰ্ভত কওঁতে শিল্পাই কয়, “এই ছবিখনৰ চৰিত্ৰটো তেনেকুৱাই, যিটো মই মোৰ ৩০ বছৰীয়া অভিনয় জীৱনত কৰা নাই। চৰিত্ৰটো মোৰ হৃদয়ৰ বহুত ওচৰৰ, অতি বাস্তৱ।”
নৱাগতা পৰিচালক শিখা শৰ্মাৰ সৈতে কাম কৰাৰ অভিজ্ঞতাৰ বিষয়ে কোৱাৰ সময়ত তেওঁ কয়, ‘এইখন শিখাৰ প্ৰথমখন ছবি হ’ব পাৰে, কিন্তু তেওঁৰ প্ৰতিভা আছে। শিখাই কৈছে, তেওঁৰ আত্মবিশ্বাস আছে যে মই চৰিত্ৰটোক উজ্জ্বলভাৱে চিত্ৰিত কৰিম। শিখাই মোক আন অভিনেতাৰ লগতে কৰ্মশালাত ৰাখিছিল। এই কথাটো মোৰ বৰ মনত পৰে। ৩০ বছৰীয়া অভিনয় জীৱনত প্ৰথমবাৰৰ বাবে এই ছবিখনৰ বাবে কৰ্মশালা কৰিছিলোঁ।’
![](https://assam.nenow.in/wp-content/uploads/2023/09/WhatsApp-Image-2023-09-12-at-10.42.46-AM-300x169.jpeg)
অহা ২২ ছেপ্টেম্বৰত ডাঙৰ পৰ্দাত মুক্তি পাব ‘সুখী’।