অসমত অতি শেহতীয়াকৈ আত্মপ্ৰকাশ কৰা শিৱ সেনা দলে অসমীয়া ইছলামধৰ্মী লোকসকলক গৰু হত্যা নকৰিবলৈ শনিবাৰে অনুৰোধ জনাইছে।
“যিহেতু হিন্দুসকলে গৰুক ভগৱান হিচাপে জ্ঞান কৰে, গতিকে আমি অনুৰোধ কৰিছো, দাবী জনোৱা নাই যে অসমৰ অসমীয়া ইছলাম ধৰ্মীসকলে আমাৰ ধৰ্মীয় অনুভূতিত আঘাত হানি গো-হত্যা কৰা কাৰ্য্য বন্ধ কৰে যেন,” গুৱাহাটী প্ৰেছ ক্লাবত দলটোৰ অসম শাখাৰ প্ৰথমখন সংবাদমেল সম্বোধন কৰি সংযোজক অশ্বিনী কুমাৰ দাসে কয়।
মহাৰাষ্ট্ৰত শক্তিশালী ভিত্তি থকা দলটোৱে গো-হত্যাৰ উপৰি অসমজনিত আন কেইবাটাও বিষয়তো মত প্ৰকাশ কৰিছে।
দলটোৱে অসমত বিদেশী চিনাক্তকৰণৰ বাবে অসম চুক্তি-নিৰ্ধাৰিত ভিত্তিবৰ্ষ ১৯৭১ক কাৰ্য্যতঃ নাকচ কৰিছে।
ৰাষ্ট্ৰীয় নাগৰিকপঞ্জীৰ ভিত্তিবৰ্ষ ১৯৫১ চন হ’ব লাগে, দলটোৰ মত।
তাৰোপৰি, অসমৰ সকলো চাকৰিতে ৮০শতাংশ নিযুক্তি “থলুৱা”ক দিয়াৰ ব্যৱস্থা কৰিবলৈ শিৱ সেনাই চৰকাৰক দাবী জনাইছে।
“অসমত যিমানবোৰ বেচৰকাৰী প্ৰতিষ্ঠান, বাণিজ্যিক খণ্ড আৰু ৰাজ্য চৰকাৰৰ অধীনৰ প্ৰতিষ্ঠান আছে সকলোতে ৮০শতাংশ থলুৱাক নিযুক্তি দিব লাগে,” সংযোজক দাসে কয়।
অসমত বিক্ৰী হৈ থকা গুটখা-পাণ মছলাজাতীয় সকলো সামগ্ৰী বন্ধ কৰিবৰ বাবেও তেওঁলোকে ৰাজ্য চৰকাৰক দাবী জনাইছে।
যোৱা ৪ অক্তোবৰত দলটোৰ অসম শাখা গঠন কৰা হৈছে।
সংযোজক দাসে জনোৱামতে, পূৰ্বেও অসমত “শিৱ সেনা” আছিল, কিন্তু দলটোৰ কোনো স্থায়ী সমিতি গঠন হোৱা নাছিল।
