বাৰ্মিংহামত আজিৰ পৰা আৰম্ভ হোৱা ২২ সংখ্যক কমনৱেলথ গেমছত আজি প্ৰথম দিনাই অসমৰ ক্ৰীড়াক্ষেত্ৰৰ বাবে আহিছে এক আশাব্যঞ্জক খবৰ। অসমৰ তাৰকা বক্সাৰ শিৱ থাপাই চমকপ্ৰদ জয়েৰে প্ৰথমখন খেলত জয়েৰে কমনৱেলথ অভিযান আৰম্ভ কৰিছে।
৬৩.৫ কিলোগ্ৰাম শাখাত প্ৰতিদ্বন্দিতা আগবঢ়োৱা থাপাই ৰাউণ্ড অফ ৩২ ত পাকিস্তানৰ সুলেইমান বালোচক ৫-০ ব্যৱধানত পৰাস্ত কৰে।
এই জয়েৰে নিজৰ শাখাত প্ৰি কোৱাৰ্টাৰ ফাইনেললৈ উন্নীত হয় তাৰকা বক্সাৰ গৰাকী।
মেচখনত প্ৰথমৰ পৰাই বালোচৰ ওপৰত আধিপত্য বিস্তাৰ কৰি শিৱ থাপাই সম্পূৰ্ণ একপক্ষীয়ভাৱে বিজয় সাব্যস্ত কৰে।
উল্লেখ্য যে বিশ্ব চেম্পিয়নশ্বিপৰ প্ৰাক্তন ব্ৰঞ্জ বিজয়ী তথা পাঁচবাৰৰ এছিয়ান চেম্পিয়নশ্বিপৰ পদক বিজয়ী শিৱ থাপাক কমনৱেলথ গেমছৰ সম্ভাব্য পদক বিজয়ীৰ তালিকাত ধৰা হৈছে।
অৱশ্যে শিৱৰ এই সফলতাৰ বিপৰীতে আজি অভিযান আৰম্ভ কৰা আন এগৰাকী অসমৰ খেলুৱৈ তানিয়া চৌধুৰীয়ে প্ৰথমখন খেলতে পৰাজিত হ’বলগীয়া হৈছে।
লন বলত ভাৰতীয় দলক প্ৰতিনিধিত্ব কৰা তানিয়াই স্ক’টলেণ্ডৰ ডী হ’গানৰ বিপক্ষে ১০-২১ ব্যৱধানত পৰাস্ত হয়।
