আজি পুৱাই বৰঝাৰস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰত অসম সন্তান শিৱ থাপাসহ উপস্থিত হয়হি ভাৰতীয়া বক্সাৰ দলৰ খেলুৱৈসকল। শিৱ থাপাসহ ভাৰতীয় বক্সাৰ সকলে কাইলৈ অৰ্থাৎ ২০ মে’ৰ পৰা গুৱাহাটীৰ কৰ্মবীৰ নবীন চন্দ্ৰ বৰদলৈ ইন্দোৰ ষ্টেডিয়ামত অনুষ্ঠিত হ’বলগীয়া ইণ্ডিয়া অ’পেন ২০১৯ প্ৰতিযোগিতাত অংশ গ্ৰহণ কৰিব।
উল্লেখযোগ্য যে সন্মুখত বিশ্ব বক্সিং চেম্পিয়মশ্বিপ আৰু টকিঅ’ অলিম্পিক আছে যদিও গৃহভূমি গুৱাহাটীত অনুষ্ঠিত হ’ব লগীয়া টুৰ্ণামেণ্টখনক লৈ অধিক আগ্ৰহী ভাৰতীয় বক্সাৰ শিৱ থাপা।
ঘৰুৱা দৰ্শকৰ উপস্থিতিত আৰু ঘৰুৱা পৰিবেশত ৬০ কেজি শাখাত প্ৰতিদ্বন্দ্বিতা কৰিবলগীয়া শিৱই সোণৰ পদক দখল কৰাৰ ক্ষেত্ৰত আত্মবিশ্বাসী হৈ আছে।
প্ৰতিযোগিতাৰ প্ৰস্তুতি সম্পৰ্কে সাংবাদিকে সোধা প্ৰশ্নৰ উত্তৰত শিৱই বিগত এছিয়ান চেম্পিয়নশ্বিপত তেওঁ ব্ৰঞ্জৰ পদক দখল কৰিবলৈ সক্ষম হৈছিল যদিও এইবাৰ পদকৰ ৰং সলনি কৰিবলৈ অধীৰ আগ্ৰহেৰে অপেক্ষা কৰি আছে বুলি মন্তব্য কৰে।
‘এছিয়ান চেম্পিয়নশ্বিপত সোণৰ পদক বেছি দূৰত নাছিল, প্ৰতিগৰাকী বক্সাৰে সোণ জয় কৰিবলৈ বিচাৰে আৰু সেই সপোন ঘৰৰ মাটিত পুৰণ হ’লে আৰু অধিক সোণত সুৱগা চৰে’ শিৱই কয়।
আনহাতে ৬ বাৰকৈ বিশ্ব চেম্পিয়ন হোৱা এম চি মেৰীকমেও ইন্দোৰ ষ্টেডিয়ামত অনুষ্ঠিত হ’বলগীয়া ইণ্ডিয়া অ’পেন ২০১৯ প্ৰতিযোগিতাত অংশ গ্ৰহণ কৰিব। আৰু ইয়াৰ বাবে এম চি মেৰীকমক কঠোৰ অনুশীলনত ব্যস্ত হৈ পৰা দেখা গৈছে।
