ঐতিহাসিক শিৱসাগৰ চহৰৰ প্ৰৱেশদ্বাৰতে থকা আবৰ্জনাৰ দ’ম তথা ডাম্পিং গ্ৰাউণ্ড পৰিষ্কাৰৰ ক্ষেত্ৰত অভিযান অব্যাহত ৰাখিছে বিধায়ক অখিল গগৈয়ে।
বৃহস্পতিবাৰে পুৱাই ৩৭ নং ৰাষ্ট্ৰীয় ঘাইপথৰ কাষতে থকা ডাম্পিং গ্ৰাউণ্ড পৰিদৰ্শন কৰে বিধায়কগৰাকীৰ লগতে ৰাইজৰ দলৰ কৰ্মী সকলে।
বৰ্তমানলৈকে বিধায়ক পুঁজি চৰকাৰে মুকলি কৰি নাই দিয়া যদিও ব্যক্তিগত পুঁজি খৰচ কৰি ৰাইজৰ দলৰ কৰ্মী সকলৰ সহায়ত ঐতিহাসিক ঠাইখন পৰিষ্কাৰ কৰি থকা হৈছে বুলি সদৰি কৰে তেওঁ।
উল্লেখ্য যে যোৱা ১৩ নৱেম্বৰত বিধায়ক অখিল গগৈয়ে ”পৰিস্কাৰ শিৱসাগৰ সেউজ শিৱসাগৰ” এই শ্লগান লৈ মাহজোৰা কাৰ্যসূচীৰে শিৱসাগৰৰ বিভিন্ন স্থান চাফ চিকুন কৰাৰ দায়িত্ব লৈছিল।
সিদিনা শিৱসাগৰ জিলা পৌৰসভা আৰু বিধায়ক অখিল গগৈৰ সহযোগত মাহজোৰা কাৰ্যসূচীৰে পৰিস্কাৰ শিৱসাগৰ সেউজ শিৱসাগৰ অভিযানৰ শুভাৰম্ভ কৰা হৈছিল।
প্ৰথমে শিৱসাগৰৰ ঐতিহাসিক যমুনা জলাশয়ৰ পৰা এই চাফাই অভিযানৰ আৰম্ভ কৰা হৈছিল।
ইয়াৰ পিছতে পৰ্য্যয়ক্ৰমে শিৱসাগৰৰ আন আন স্থানসমুহ পৰিস্কাৰ কৰাৰ লক্ষ্য বান্ধি লৈছিল বিধায়ক অখিল গগৈয়ে।
শিৱসাগৰক ৱৰ্ল্ড হেৰিটেজ চিটি হিচাপে গঢ়ি তোলাৰ ক্ষেত্ৰত ই এক প্ৰাথমিক কাৰ্য বুলি উল্লেখ কৰিছিল অখিল গগৈয়ে।
এই ক্ষেত্ৰ সকলো শিৱসাগৰবাসীক সহযোগ কৰিবলৈ আহ্বান জনাইছিল বিধায়ক অখিল গগৈয়ে।
