আশীৰ উৰ্দ্ধৰ এগৰাকী শিল্পী৷ নাম ভলৌ হাজৰিকা৷ বোকাখাত মহকুমাৰ কুৰুৱাবাহী গাঁও পঞ্চায়তৰ অন্তৰ্গত মৰিয়াহোলা যোগনীয়া গাঁৱৰ নিৱাসী ভলৌ হাজৰিকা৷
এগৰাকী বায়ন হিচাপে পৰিচিত ভলৌ হাজৰিকা সৰুৰে পৰাই খোল বাদ্যৰ সৈতে জড়িত৷ সেই সূত্ৰে ৰাজ্য চৰকাৰে ভলৌ হাজৰিকাক ২০২০ বৰ্ষৰ ১৫ আগষ্টত শিল্পী পেঞ্চন প্ৰদান কৰাৰ কথা ঘোষণা কৰিছিল৷
ভলৌ হাজৰিকাই ১৫ আগষ্টৰ পৰাই কাৰ্যকৰি হোৱাকৈ শিল্পী পেঞ্চন লাভ কৰিব বুলি ঘোষণা কৰিছিল যদিও ২০২১ বৰ্ষৰ শিল্পী দিৱসৰ দিনটোলৈকে শিল্পীগৰাকীয়ে শিল্পী পেঞ্চনৰ নামত ফুটাকড়ি এটাও লাভ নকৰিলে৷
চৰ্ম কৰ্কট ৰোগত ভোগী থকা অতি দৰিদ্ৰ ভলৌ হাজৰিকাই শিল্পী পেঞ্চন লাভৰ আশাত বিভিন্ন ব্যক্তিৰ পৰা ধন ধাৰে লৈ গুৱাহাটীত ৰোগ চিকিৎসা কৰাইছিল৷
কিন্তু শিল্পী পেঞ্চন লাভ নকৰা ভলৌ হাজৰিকাই এতিয়া ঋণ পৰিশোধ কৰাক লৈ সমস্যাত পৰিছে৷ আৰ্থিক নাটনিত হাবু ডুবু খাইছে৷ ইফালে চৰকাৰে শিল্পী পেঞ্চনৰ নামত শিল্পীগৰাকীৰ পৰা নতুন নতুন তথ্যহে বিচাৰিছে৷ যাৰ বাবে নিৰক্ষৰ ভলৌ হাজৰিকা এতিয়া আন এক বিপদতহে পৰিছে৷
আজি বোকাখাত নাট্য মন্দিৰে আয়োজন কৰা শিল্পী দিৱসত সম্বৰ্ধনা জনোৱা হয় শিল্পী গৰাকীক।
সম্বৰ্ধনা গ্ৰহণৰ পাছত সাংবাদিকৰ সৈতে হোৱা বাৰ্তালাপত শিল্পী ভলৌ হাজৰিকাই এই বিষয়ে কৈ হতাশা প্ৰকাশ কৰে।
বোকাখাত নাট্য মন্দিৰৰ উদ্যোগত আজি স্থানীয় নাট্য মন্দিৰত আজি দিনজোৰা কাৰ্সুচীৰে শিল্পী দিৱস উদাসন কৰা হয়৷
সভাপতি দিলীপ শইকীয়াই স্মৃতি তৰ্পণেৰে শুভাৰম্ভ কৰা অনুষ্ঠানত বিভিন্ন সাংস্কৃতিক কাৰ্যক্ৰমৰ লগতে এচিএচ লাভ কৰা বোকাখাতৰ যুৱক বেদব্ৰত পেগুকো সম্বৰ্ধনা জনায়।
আলেখ্য, সমবেত সংগীত, জ্যোতি সংগীতেৰে উদযাপিত অনুষ্ঠানৰ আঁত ধৰে সম্পাদক জিতু শৰ্মা ৰাজখোৱাই।
