ক’ৰ’ণাতংকই শিল্পী,কলা-কুশলীসকলৰ জীৱন-জীৱিকাৰ প্ৰতি চৰম ভাবুকি কঢ়িয়াই অনাৰ সময়তে গুৱাহাটীৰ জোনালীত থকা এন কে প্ৰডাকশ্যনত আজি এখন সংবাদমেল সম্বোধন কৰে শিল্পী তথা ‘কা’ বিৰোধী আন্দোলনৰ গুৰি ধৰোতা সকলৰ অন্যতম মানস ৰবীনে।
সংবাদমেলত মানস ৰবীনে কয় যে ক’ৰ’ণাৰ ভয়াৱহতা আঁতৰা নাই, তেনে সময়ত ৰাজনৈতিক সভা-সমিতি পাতিব পাৰিছে, সকলো অনুষ্ঠান-প্ৰতিষ্ঠান খোলা হৈছে, কিন্তু সাংস্কৃতিক অনুষ্ঠান বন্ধ কৰি ৰখা হৈছে।
এনে অৱস্থাত পানীত হাঁহ নচৰা অৱস্থা হৈছে সাংস্কৃতিক কৰ্মীসকলৰ।
এই সন্দৰ্ভত ক্ষোভ প্ৰকাশ কৰি জনপ্ৰিয় শিল্পী মানস ৰবীনে কয়—”সকলো ব্যৱস্থালৈ স্বাভাৱিক অৱস্থা ঘুৰি আহিছে, কিন্তু সাংস্কৃতিক ক্ষেত্ৰলৈ কিয় স্বাভাৱিক অৱস্থা ঘূৰি অহা নাই? শিল্পীসকল ক’ৰ’ণাৰ ব্ৰেণ্ড এম্বেচাদৰ নেকি?”
শিল্পী সকলে কা’ আন্দোলনত অংশগ্ৰহণ কৰিছিল বাবেই এতিয়া শাস্তি প্ৰদান কৰি থকা হৈছে নেকি বুলিও প্ৰশ্ন কৰে শিল্পীগৰাকীয়ে।
ক’ৰ’ণা কালত চৰকাৰে শিল্পীসকলৰ বাবে ঘোষণা কৰা ৬ হাজাৰ টকাৰ এক কালীন সাহায্যৰ এটা ফুটাকড়িও পোৱা নাই বুলি তেওঁ খেদ প্ৰকাশ কৰে।
জীয়াই থকা আৰু জীয়াই ৰখাৰ স্বাৰ্থতে শিল্পীসকলৰ সাংস্কৃতিক অনুষ্ঠান খোলা দিয়াৰ বাবে দাবী জনায় মানস ৰবীনে।
কা’ আন্দোলনৰ পৰা আৰম্ভ কৰি পৰৱৰ্তী সময়ত ক’ৰ’ণাৰ ভয়াৱহতা আৰু লকডাউনৰ বাবে সংগীত তথা কৃষ্টি-সংস্কৃতিৰ লগত জড়িত ব্যক্তিসকল যোৱা প্ৰায় ১০ মাহ ধৰি অনুষ্ঠান পৰিৱেশন কৰাৰ পৰা বঞ্চিত হৈ আছে বুলিও শিল্পীগৰাকীয়ে প্ৰকাশ কৰে।
তেওঁ ক্ষোভ প্ৰকাশ কৰি কয়, “হেঙেৰাবাৰীলৈ গৈ গেৰুৱা গলবস্ত্ৰ ধাৰণ কৰিলেহে কোনো শিল্পীয়ে সুবিধা পাব নেকি?”
“শিল্পীৰ অমিয়া পৰিবেশন শুনিছে, কা’ আন্দোলনৰ সময়ত শিল্পীৰ অগ্নিগৰ্ভ ভাষণ শুনিছে, শিল্পীৰ তাণ্ডৱ দেখা নাই, শিল্পীৰ তাণ্ডৱ দেখিলে গম পাই যাব”—এইদৰে চৰকাৰক পুনৰবাৰ সকিয়াই দিয়ে মানস ৰবীনে।
