শিৱসাগৰ জিলাৰ পৰ্যটন খণ্ডৰ উন্নয়ন, বিকাশ আৰু প্ৰচাৰৰ বাবে উপায়ুক্ত এম এছ লক্ষ্মীপ্ৰিয়াই গ্ৰহণ কৰা “Soulful Sivasagar” অভিযানৰ অংশস্বৰূপে শনিবাৰে অৰ্থাৎ ২৬ অক্টোবৰত দিচাংমুখ অঞ্চল পৰিদৰ্শন কৰে।
শিৱসাগৰ নগৰৰ পৰা নাতিদূৰৈত অৱস্থিত এই ঠাইখনৰ প্ৰাকৃতিক সৌন্দৰ্য হৈছে ইয়াৰ আকৰ্ষণৰ কেন্দ্ৰবিন্দু।
মহাবাহু ব্ৰক্ষ্মপুত্ৰ আৰু দিচাং উপনদীৰ সংগমস্থলী দিচাংমুখত টীম Soulful শিৱসাগৰৰ সৈতে উপস্থিত হৈ উপায়ুক্তগৰাকীয়ে এই অঞ্চলক দেশী-বিদেশী পৰ্যটকৰ বাবে আকৰ্ষণীয় ৰূপত গঢ়ি তুলিবলৈ ল’বলগীয়া ব্যৱস্থাৱলী সমূহৰ বিষয়ে বিস্তৃতভাৱে বুজ লয়।
তেওঁ অঞ্চলটোৰ স্থানীয় ৰাইজৰ লগতো এই সন্দৰ্ভত মত-বিনিময় কৰি তেওঁলোকৰ সমস্যাৰাজিৰ বিষয়ে বুজ লয়। উপায়ুক্তগৰাকীয়ে জিলা-প্ৰশাসনৰ এই উদ্যোগৰ ক্ষেত্ৰত তেওঁলোকৰ পৰা পূৰ্ণ সহযোগিতা আহ্বান কৰে।
স্থানীয় ৰাইজৰ অতিথ্য গ্ৰহণ কৰাৰ লগতে তেওঁলোকে পৰিবেশন কৰা থলুৱা খাদ্যসম্ভাৰৰ জুতিও লয় উপায়ুক্তগৰাকীয়ে। তেওঁ অঞ্চলটোৰ ৰাইজক পৰ্যটকৰ আগমনত ‘অতিথি দেব ভব’ ভাৱেৰে উদ্বুদ্ধ হৈ অতিথ্য প্ৰদান কৰিবলৈ আহ্বান জনায়।
পৰিদৰ্শন কালত উপায়ুক্তগৰাকীয়ে পৰ্যটনৰ দৃষ্টিভংগীৰে অঞ্চলটোৰ সম্ভাৱনীয়তা সমূহৰ বিষয়ে অধ্যয়ন কৰে আৰু এই সমূহৰ সদব্যৱহাৰ আৰু বিকাশৰ বাবে ল’বলগীয়া পদক্ষেপ সমূহৰ বিষয়ে বিতংভাৱে আলোচনা কৰে।
