আজি সন্ধিয়া অহা এজাক বৰষুণত শিৱসাগৰ চহৰৰ প্ৰাণ কেন্দ্ৰ দ’লমুখ চাৰিআলি, বাবুপট্টী, পুৰণা চক বজাৰ পথ, কেন্দ্ৰীয় বজাৰ, আমোলাপট্টী, বৰ্ডিং ৰোড, বিজি ৰ’ড আদিকে ধৰি বিভিন্ন অঞ্চল পানীত ডুব যায়।
বিজেপি নেতৃত্বধীন শিৱসাগৰ পৌৰসভাই কাৰ্যকাল শেষ কৰিলে যদিও শিৱসাগৰ চহৰৰ উন্নয়নৰ নামত গ্ৰহণ কৰা আঁচনিসমূহ যে কেৱল কাগজতে সীমাবদ্ধ হৈ থাকিল কাতেই যেণ পুনৰ এবাৰ প্ৰমাণিত কৰিলে।
উল্লেখ্য যে ২০১৮ চনতেই শিৱসাগৰ চহৰৰ সৌন্দৰ্য বৰ্দ্ধন আৰু আন্তঃগাঁথনি উন্নয়নৰ বাবে চিটি ইনফ্ৰাষ্ট্ৰাকচাৰ ডেভেলপমেন্ট ফাণ্ডৰ জৰিয়তে ১০০ কোটি টকা আৱন্টন পোৱা বুলি ঘোষণা কৰিছিল সেই সময়ৰ বিজেপি নেতৃত্বধীন শিৱসাগৰ পৌৰসভাই।
সেই টকাৰে শিৱসাগৰ চহৰৰ সৌন্দৰ্য বৰ্দ্ধনৰ বাবে বহু অভিলাষী আঁচনি ঘোষণা কৰি নিবিদাও আহ্বান কৰিছিল পৌৰসভা তথা জিলা প্ৰশাসনে। ইয়াৰ ভিতৰত আছিল শিৱসাগৰ চহৰৰ নলা-নৰ্দমা সমূহ বিজ্ঞানসন্মতভাৱে নিৰ্মাণ কৰা।
কিন্তু চিটি ইনফ্ৰাষ্ট্ৰাকচাৰ ডেভেলপমেন্ট ফাণ্ডৰ পৰা লাভ কৰা ১০০ কোটি টকাৰে শিৱসাগৰ চহৰক ন ৰূপত সজাই তুলিব বুলি ঘোষণা কৰা পৌৰসভাই নলা-নৰ্দমা নিৰ্মাণত বিগত দুটা বছৰে কোনো কামেই হাতত নল’লে।
যাৰ বাবে এজাক বৰষুণতেই শিৱসাগৰ চহৰৰ অধিকাংশ অঞ্চল কৃত্ৰিম বানপানীত বুৰ যায়।
এতিয়া সাধাৰণ ৰাইজৰ প্ৰশ্ন- ক’ত গল শিৱসাগৰ চহৰৰ সৌন্দৰ্য বৰ্দ্ধনৰ বাবে অহা ১০০ কোটি টকা? হিচাপ দিবনে পূৰ্বৰ বিজেপি নেতৃত্বধীন শিৱসাগৰ পৌৰসভাই। নে কেৱল আঁচনি ঘোষণা কৰিয়েই ফাইলতেই আৱদ্ধ হৈ ৰ’ল ১০০ কোটি টকা।
