চুবুৰীয়া দেশ নেপালৰ দক্ষিণ ভৈয়ামৰ বাৰা জিলাত সংঘটিত হৈছে এক ভয়ংকৰ পথ দুৰ্ঘটনা। এই দুৰ্ঘটনাত প্ৰাণ হেৰুৱাইছে ৬ গৰাকী ভাৰতীয় তীৰ্থযাত্ৰীয়ে।
আজি পুৱতি নিশা সংঘটিত হোৱা এই দুৰ্ঘটনাটোত ভাৰতীয় তীৰ্থযাত্ৰীকেইগৰাকীৰ লগতে আন এজন লোকৰো মৃত্যু হয়। মৃত আনগৰাকী ব্যক্তি নেপালৰ স্থানীয় লোক বুলি জানিব পৰা গৈছে।
আৰক্ষীয়ে জানিবলৈ দিয়া মতে, কাঠমাণ্ডুৰ পৰা জনকপুৰলৈ যাত্ৰা কৰা যাত্ৰীবাহী বাছখন বাৰা জিলাৰ চুৰীয়ামাইৰ সমীপত দুৰ্ঘটনাত পতিত হয়।
পুৱা প্ৰায় ২ বজাত নিয়ন্ত্ৰণহীন হৈ পৰা বাছখন চুৰীয়ামাই মন্দিৰৰ দক্ষিণে থকা নদীৰ পাৰত প্ৰায় ৫০ মিটাৰ তললৈ বাগৰি পৰে।
এই দুৰ্ঘটনাত ভাৰতীয় তীৰ্থযাত্ৰীকেইগৰাকীসহ সাতগৰাকী লোকৰ মৃত্যু হোৱাৰ বিপৰীতে আন ১৯ গৰাকী লোক আহত হয়।
নিহত ভাৰতীয় তীৰ্থযাত্ৰীকেইগৰাকী ৰাজস্থানৰ বুলি চিনাক্ত কৰা হৈছে। ইতিমধ্যে নিহত লোককেইগৰাকীৰ পৰিয়ালক এই খবৰ অৱগত কৰোৱা হৈছে বুলি নেপাল আৰক্ষীৰ এগৰাকী উচ্চপদস্থ বিষয়াই সদৰী কৰে।
উল্লেখ্য যে, দুৰ্ঘটনাগ্ৰস্ত বাছখনত দুগৰাকী চালক আৰু এগৰাকী সহায়ক ধৰি মুঠ ২৭জন লোক আছিল। দুৰ্ঘটনাত চালক দুগৰাকী আৰু সহায়কগৰাকীও আহত হয়।
আঘাতপ্ৰাপ্ত চালক তথা সহায়ক কেইগৰাকীক চিকিৎসাৰ অন্তত আটক কৰি ৰখা হৈছে বুলি আৰক্ষীয়ে জানিবলৈ দিয়ে।
আনহাতে আহত আনসকল লোক কাষৰীয়া চিকিৎসালয়ত চিকিৎসাধীন হৈ আছে বুলি সদৰী কৰে আৰক্ষীয়ে।
