আমেৰিকা যুক্তৰাষ্ট্ৰৰ ভাৰ্জিনিয়া প্ৰদেশৰ এখন প্ৰাথমিক বিদ্যালয়ৰ শ্ৰেণীকোঠাতেই শিক্ষয়িত্ৰীৰ ওপৰত গুলী চলালে এটি শিশু শিক্ষাৰ্থীয়ে। এই ঘটনাত শিক্ষয়িত্ৰীগৰাকী গুৰুতৰভাৱে আহত হয়।
অৱশ্যে, এই আক্ৰমণটোত কোনো শিক্ষাৰ্থী আহত হোৱা নাই বুলি জানিব পৰা গৈছে।
স্থানীয় আৰক্ষী প্ৰধান ষ্টিভ ড্ৰিউৱে জনায় যে আক্ৰমণকাৰী ৬ বছৰীয়া শিক্ষাৰ্থীগৰাকী বৰ্তমান আৰক্ষীৰ জিম্মাত আছে।
লগতে পঢ়ক: বিমানত সহযাত্ৰী মহিলাৰ গাত প্ৰস্ৰাৱ কৰা অভিযুক্ত শংকৰ মিশ্ৰক গ্ৰেপ্তাৰ; হ’ব পাৰে ৩ বছৰ কাৰাবাস!
আৰক্ষীয়ে লগতে জানিবলৈ দিছে যে আঘাতপ্ৰাপ্ত শিক্ষয়িত্ৰীগৰাকীৰ বয়স ৩০ বছৰ আৰু তেওঁ বৰ্তমান সংকটজনক অৱস্থাত আছে ।
বিদ্যালয়খনৰ অধীক্ষক জৰ্জ পাৰ্কাৰে এনে ঘটনা ৰোধৰ বাবে আৱাসীসকলক বন্দুকৰ ব্যৱহাৰ বন্ধ কৰিবলৈ আহ্বান জনাইছে।
লগতে পঢ়ক: প্ৰকৃতিৰ আগত কোন আমেৰিকা! কেলিফৰ্ণিয়াত ধুমুহাৰ তাণ্ডৱ; বিদ্যুৎ বিহীন প্ৰায় ৭০ হাজাৰ ঘৰ
আমেৰিকা যুক্তৰাষ্ট্ৰত বিদ্যালয়ত গুলীচালনাৰ ঘটনা বৃদ্ধি পাইছে। যোৱা বছৰৰ মে’ মাহত টেক্সাছৰ এখন বিদ্যালয়ত সংঘটিত গুলীচালনাৰ ঘটনাত শিক্ষাৰ্থী আৰু শিক্ষককে ধৰি ২১ জন লোক নিহত হৈছিল।
