কৰ্ণাটকৰ চিত্ৰদুৰ্গা জিলাত এটা বন্ধ ঘৰৰ ভিতৰত উদ্ধাৰ হৈছে একেটা পৰিয়ালৰ পাঁচজন সদস্যৰ কংকালৰ অৱশিষ্ট। এই ঘটনাই চাঞ্চল্যৰ সৃষ্টি কৰিছে ৰাজ্যখনত।
পৰিয়ালটোৰ আত্মীয়ই আৰক্ষীক জানিবলৈ দিয়া মতে, পৰিয়ালটোৱে সম্পূৰ্ণ নিৰ্জন অৱস্থাত জীৱন কটাইছিল আৰু গুৰুতৰ স্বাস্থ্যজনিত সমস্যাৰ সৈতে যুঁজি আছিল।
লক্ষণীয়ভাৱে ২০১৯ চনৰ জুলাই মাহৰ আশে-পাশেই পৰিয়ালটোৰ সদস্যকেইজনক অন্তিমবাৰৰ বাবে দেখা পোৱা গৈছিল। বাসগৃহটোও তলা বন্ধ অৱস্থাতে দেখা পোৱা গৈছিল।
প্ৰকাশিত খবৰ অনুসৰি, প্ৰায় দুমাহ পূৰ্বে স্থানীয় কোনো লোকে প্ৰাতঃ ভ্ৰমণৰ সময়ত ঘৰটোৰ মূল কাঠৰ দুৱাৰখন ভাঙি যোৱা অৱস্থাত লক্ষ্য কৰিছিল।
কিন্তু তথাপিও তেওঁলোকে এই বিষয়ে আৰক্ষীক অৱগত কৰা নাছিল। পিছত ঘৰটোৰ ভিতৰত একাধিকবাৰ লুটপাত কৰাৰ ইংগিত পোৱা যায়।
ইফালে আৰক্ষীয়ে এই বিষয়ে জানিব পাৰি উক্ত স্থানত উপস্থিত হয় আৰু ঘৰটোৰ ভিতৰত পৰীক্ষা চলাই পাঁচটা মৃতদেহ উদ্ধাৰ কৰে।
ইয়াৰে এটা কোঠাত চাৰিটা কংকাল, দুটা বিচনাত আৰু দুটা মজিয়াত পৰি থকা অৱস্থাত আৰু আন এটা কোঠাত আন এটা কংকাল উদ্ধাৰ হয়।
মৃতদেহকেইটা উদ্ধাৰ কৰাৰ পিছতে বিতং পৰীক্ষাৰ বাবে ফৰেনছিক দল ঘটনাস্থলীত উপস্থিত হয় আৰু প্ৰমাণ সংগ্ৰহ কৰে।
স্থানীয় লোকৰ বক্তব্যৰ ভিত্তিত মৃতদেহকেইটা পৰিয়ালৰ মূল দম্পতীহাল, তেওঁলোকৰ পুত্ৰ-কন্যা আৰু নাতিৰ বুলি সন্দেহ কৰা হৈছে।
অৱশ্যে ফৰেনছিক ৰিপ’ৰ্টৰ পিছত মৃতকেইজনৰ পৰিচয় নিশ্চিত কৰা হ’ব বুলি তদন্তকাৰী স্থানীয় আৰক্ষী বিষয়াগৰাকীয়ে জানিবলৈ দিয়ে।
লোককেইজনৰ মৃত্যুৰ প্ৰকৃত কাৰণ স্পষ্ট হোৱা নাই আৰু এই বিষয়ে তদন্ত অব্যাহত আছে বুলি বিষয়াগৰাকীয়ে লগতে সদৰী কৰে।
