দুবছৰ ধৰি বন্ধ হৈ থকা এটা ফ্লেট। মঙলবাৰে ফ্লেটটোত চলোৱা হৈছিল চাফাই আৰু মেৰামতিৰ কাম। তেনে সময়তে ফ্লেটটোত থকা এটা প্লাষ্টিকৰ ড্ৰামত উদ্ধাৰ হয় চিমেণ্ট সানি ঢাকি থোৱা এটা নৰকংকাল। এই চাঞ্চল্যকৰ ঘটনা ঘটিছে কলকাতাৰ বাগুয়াটিত।
চাৰি মহলীয়া অট্টালিকাটোৰ ওপৰৰ মহলাত থকা এই ফ্লেটটো ২০১৮ চনত এহাল নেপালী দম্পতীয়ে পাঁচ বছৰৰ বাবে ভাড়াত লৈছিল। দুবছৰ পূৰ্বে ভাড়াতীয়া দম্পতীহালে ফ্লেটটোত তলা মাৰি গুচি গৈছিল যদিও নিয়মিত ভাড়া দি আছিল।
কিন্তু বিগত ছমাহ ধৰি ঘৰৰ মালিকে ভাড়াৰ ধন লাভ নকৰাত তলা ভাঙি ফ্লেটটো চাফা কৰি নতুনকৈ ভাড়াত দিয়াৰ সিদ্ধান্ত লয়। তেতিয়াই বন্ধ কোঠালিটোৰ ভিতৰত উদ্ধাৰ হয় এই নৰকংকালটো।
বিল্ডিঙৰ স্বত্বাধিকাৰী গোপাল মুখাৰ্জী নামৰ ব্যক্তিগৰাকীয়ে এই সন্দৰ্ভত দিয়া ভাষ্যমতে, উক্ত ফ্লেটটোত ভাড়াত থকা দম্পতীহালৰ বয়স আছিল আনুমানিক ৩০ বছৰ। ক’ভিডৰ সময়তো তেওঁলোক ফ্লেটটোত বাস কৰিছিল যদিও ২০২১ চনত নেপাললৈ গুচি যায়।
প্ৰকাশিত খবৰ অনুসৰি, উদ্ধাৰ হোৱা কংকালটোৰ এহাতত এডাল খাৰু সদৃশ গহণাৰ লগতে নাইটড্ৰেছৰ দৰে পোছাকৰ অৱশিষ্ট দেহত দেখিবলৈ পোৱা গৈছে। অৱশ্যে নৰকংকালটো পুৰুষ নে মহিলাৰ সেয়া আৰক্ষীয়ে নিশ্চিত কৰিব পৰা নাই।
অট্টালিকাটোৰ গৰাকী গোপাল মুখাৰ্জীয়ে উল্লেখ কৰা মতে, দম্পতীহালে কেইমাহমানৰ বাবে ঘৰলৈ যাম বুলি কৈছিল যদিও সোনকালে ঘূৰি আহিব বুলি তথা এই সময়ছোৱাত ভাড়া দি থাকিব বুলি প্ৰতিশ্ৰুতি দিছিল। প্ৰথম অৱস্থাত সময়মতে ধন পৰিশোধ কৰিছিল দম্পতীহালে।
কিন্তু বিগত বৰ্ষৰ পৰা ধন আদায় দিয়াও পলম কৰিছিল দম্পতীহালে। এই ধন পৰিশোধৰ বাবে মুখাৰ্জীয়ে আহ্বান জনোৱাত দম্পতীহালে ফোনযোগে আৰ্থিক অসুবিধাত পৰা বুলি উল্লেখ কৰাৰ লগতে দুমাহৰ পূৰ্বে পুনৰ ফোনযোগেই ধন দিয়াৰ প্ৰতিশ্ৰুতি দিছিল।
কিন্তু তাৰ পিছতো ধন লাভ নকৰাত মুখাৰ্জীয়ে ফ্লেটটো আকৌ ভাড়াত দিয়াৰ সিদ্ধান্ত লয় আৰু দুগৰাকী লোকক ফ্লেটটোৰ চাফাই আৰু মেৰামতিৰ বাবে নিয়োগ কৰে। মঙলবাৰে শ্ৰমিক দুগৰাকীয়ে শৌচাগাৰত দেখিবলৈ পায় এটা নীলা ৰঙৰ প্লাষ্টিকৰ পানীৰ ড্ৰাম।
এই ড্ৰামটো আঁতৰাবলৈ চেষ্টা চলাওঁতে তেওঁলোকে ড্ৰামটো চিমেণ্টেৰে বন্ধ কৰি থোৱা দেখিবলৈ পায়। চিমেণ্টৰ আৱৰণ ভাঙি থাকোঁতেই তেওঁলোকে এক দুৰ্গন্ধ পায় আৰু তাৰ পিছতে ড্ৰামটোৰ ভিতৰত এটা মৃতদেহৰ কংকালৰ অৱশিষ্ট উদ্ধাৰ কৰে।
লগে লগে তেওঁলোকে ঘৰৰ গৰাকী মুখাৰ্জীক এই বিষয়ে অৱগত কৰে আৰু তেওঁ আৰক্ষীক খবৰ দিয়ে। ঘটনাস্থলীত উপস্থিত হৈ আৰক্ষীয়ে কংকালটো উদ্ধাৰ কৰে। আৰক্ষীয়ে জানিবলৈ দিয়া মতে, মুখাৰ্জীয়ে ভাড়াতীয়া দম্পতীহালৰ কোনো ফটো দিব পৰা নাছিল আৰু তেওঁলোকৰ নামো মনত পেলাব পৰা নাছিল।
তেওঁ আৰক্ষীক এটা ফোন নম্বৰ দিয়ে যদিও উক্ত নম্বৰটোত যোগাযোগৰ চেষ্টা কৰি সেৱা বন্ধ পায় আৰক্ষীয়ে। অৱশ্যে ভাড়াতীয়াৰ সৈতে কৰা চুক্তিপত্ৰ তেওঁৰ হাতত থকা বুলি জানিবলৈ দিছে ঘৰৰ গৰাকী মুখাৰ্জীয়ে। এই চুক্তিপত্ৰ লাভ কৰিলেহে দম্পতীহালৰ পৰিচয় লাভ কৰিব বুলি আৰক্ষীয়ে জানিবলৈ দিছে।
আনহাতে কংকালটোৰ পোছাকৰ অৱশিষ্ট আৰু হাতৰ গহণালৈ লক্ষ্য কৰি মৃতদেহটো মহিলাৰ বুলি আৰক্ষীয়ে সন্দেহ প্ৰকাশ কৰিছে যদিও মৰণোত্তৰ পৰীক্ষাৰ পাছতহে লিংগ আৰু লগতে মৃত্যুৰ সময় তথা কাৰণ চিনাক্ত কৰিব পৰা হ’ব বুলি সদৰী কৰিছে।
