দুৰ্নীতিৰ বিৰুদ্ধে অনশন কৰি প্ৰাণ হেৰুৱালে উত্তৰ প্ৰদেশৰ সমাজ কৰ্মীয়ে

উত্তৰ প্ৰদেশত দুৰ্নীতিৰ বিৰুদ্ধে অনশন কৰি মৃত্যুক আকোৱালি ল’লে এগৰাকী সমাজ কৰ্মীয়ে। জানিব পৰা মতে, সমাজ কৰ্মী জনৰ নাম দেৱকী নন্দ শৰ্মা। মৃত্যুৰ সময়ত তেওঁৰ বয়স আছিল ৬৬ বছৰ।

বৃহস্পতিবাৰে সংঘটিত হৈছে এই ঘটনা। উত্তৰ প্ৰদেশৰ মথুৰা জিলা চিকিৎসালয়ত মৃত্যু হৈছে সমাজ কৰ্মী গৰাকীৰ।

মন্তেৰৰ মহকুমাধিপতি আদেশ কুমাৰে কয় যে সমাজকৰ্মী দেৱকী নন্দ শৰ্মাই গ্ৰামোন্নয়ন বিভাগত এজাহাৰ দাখিল কৰিছিল যে জিলাখনত শৌচাগাৰ আৰু এম জি এনৰেগাৰ কাম-কাজৰ ক্ষেত্ৰত দুৰ্নীতি সংঘটিত হৈছে। কিন্তু বিভাগে দাখিল কৰা তদন্তৰ প্ৰতিবেদনত তেওঁ একমত নহ’ল। ইয়াৰ পিছতে তেওঁ ১২ ফেব্ৰুৱাৰীৰ পৰা নিজৰ বাসগৃহৰ সমীপৰ মন্দিৰৰ সন্মুখত অনশন কৰি ন্যায়ৰ দাবীত বহিছিল।

আদেশ কুমাৰে আৰু কয়, ‘মই তেওঁক অনশন বন্ধ কৰিবলৈ অনুৰোধ কৰিছিলো। কিন্তু ন্যায়ৰ আশাত তেওঁ মোৰ প্ৰস্তাৱত সন্মতি নিদিলে। তেওঁ মোক সকলো সমস্যা লিখিতভাৱে সমাধান কৰাৰ প্ৰতিশ্ৰুতি দিবলৈ ক’লে। কিন্তু মোৰ সেই শক্তি নাই’।

মৃত সমাজকৰ্মীজনৰ পৰিয়ালৰ সূত্ৰৰ পৰা জানিব পৰা মতে, অনশনৰ বাবে তেওঁৰ অৱস্থাৰ অৱনতি ঘটাত তেওঁক প্ৰথমে স্বাস্থ্য কেন্দ্ৰত ভৰ্তি কৰা হৈছিল। তাৰ পৰাই তেওঁক জিলা চিকিৎসালয়লৈ স্থানান্তৰ কৰা হয়। কিন্তু জিলা চিকিৎসালয়ত সমাজকৰ্মী গৰাকীয়ে শেষ নিশ্বাস ত্যাগ কৰে।