মাতৃক কৰা অশালীন ব্যৱহাৰ নহ’ল সহ্য: ইটাৰে খুন্দিয়াই সুৰাসক্ত দুৰ্বৃত্তক হত্যা পুত্ৰৰ
এগৰাকী মহিলাক উৎপীড়ন কৰিবলৈ চেষ্টা কৰাৰ বাবে এজন নিচাগ্ৰস্ত ব্যক্তিক খঙত একো নাই হৈ হত্যা কৰিছে মহিলাগৰাকীৰ পুত্ৰই। এই ঘটনা সংঘটিত হৈছে অন্ধ্ৰ প্ৰদেশৰ বিশাখাপত্তনমত।
জানিব পৰা মতে দেওবাৰে পুৱা ৪৫ বছৰীয়া শ্ৰীনু নামৰ নিচাগ্ৰস্ত ব্যক্তিগৰাকীয়ে গৌৰী নামৰ মহিলাগৰাকীক অশালীন ব্যৱহাৰ কৰাৰ লগতে মহিলাগৰাকীৰ হাত ধৰিবলৈ চেষ্টা কৰিছিল।
এই দুৰ্ব্যৱহাৰৰ বিৰোধ কৰি গৌৰীয়ে নিচাগ্ৰস্ত ব্যক্তিগৰাকীৰ সৈতে তীব্ৰ তৰ্ক কৰে। অৱশ্যে স্থানীয় লোকৰ হস্তক্ষেপত দুয়ো ঘটনাস্থলীৰ পৰা আঁতৰি যায়।
আনহাতে গৌৰীয়ে নিজ পুত্ৰ প্ৰসাদক ফোন যোগে এই বিষয়ে অৱগত কৰাৰ লগে লগে প্ৰসাদ আহি উপস্থিত হয় আৰু শ্ৰীনুৰ পিছে পিছে গৈ তেওঁৰ মুখ আৰু মূৰত ইটাৰে আঘাত কৰে।
তাৰ পিছতে শ্ৰীনুৰ আঘাতপ্ৰাপ্ত শৰীৰ টানি মাকৰ ওচৰলৈ লৈ যায় প্ৰসাদে। আনহাতে শ্ৰীনুৰ মৃত্যু হোৱা বুলি নিশ্চিত হোৱাৰ পিছত মহিলাগৰাকী আৰু তেওঁৰ পুত্ৰই সেই ঠাই এৰি যায়।
হত্যাকাণ্ডৰ এই সম্পূৰ্ণ দৃশ্য ঘটনাস্থলীত থকা চিচিটিভি কেমেৰাত বন্দী হয়। পিছত আৰক্ষীয়ে খবৰ লাভ কৰি ঘটনাস্থলীত উপস্থিত হয় আৰু প্ৰত্যক্ষদৰ্শী তথা চিচিটিভি ফুটেজৰ আধাৰত মাতৃ-পুত্ৰক বিচাৰি উলিয়ায়।
ইতিমধ্যে দুয়োগৰাকীকে গ্ৰেপ্তাৰ কৰা হৈছে আৰু আই পি চি- ৰ প্ৰাসঙ্গিক ধাৰাৰ অধীনত তেওঁলোকৰ বিৰুদ্ধে গোচৰ ৰুজু কৰা হৈছে বুলি স্থানীয় এগৰাকী আৰক্ষী বিষয়াই জানিবলৈ দিছে।