মহিলাক যৌন নিৰ্যাতনৰ অভিযোগত গ্ৰেপ্তাৰ বিজেপিৰ প্ৰাক্তন মন্ত্ৰীৰ পুত্ৰসহ ২ জন
মাতাল অৱস্থাত এগৰাকী মহিলাক অশ্লীল মন্তব্য আৰু যৌন নিৰ্যাতন কৰাৰ অভিযোগ। উত্তৰ প্ৰদেশত বিজেপিৰ প্ৰাক্তন মন্ত্ৰীৰ পুত্ৰসহ দুজন লোকক গ্ৰেপ্তাৰ কৰা হৈছে।
আৰক্ষীয়ে জনোৱা মতে, ধৃত অভিযুক্ত দুজনৰ নাম আৰ্য্যমান ৰঘুবংশী (২৮) আৰু শৌৰ্য গুপ্তা (১৮)। আৰ্য্যমান প্ৰাক্তন মন্ত্ৰী সুধিৰ কুমাৰ বালিয়ানৰ পুত্ৰ। কল্যাণ সিঙৰ নেতৃত্বত পূৰ্বৰ বিজেপি চৰকাৰৰ সমবায় মন্ত্ৰী আছিল।
আৰক্ষী অধীক্ষক অমৃত জৈনে জনোৱা মতে, শুকুৰবাৰে মুজাফ্ফৰনগৰৰ নয়ি মাণ্ডী অঞ্চলত সংঘটিত হয় এই ঘটনা।
অভিযুক্ত দুজনে মদ্যপান কৰি মাতাল অৱস্থাত এখন স্কুটী চলাই আহিছিল। সেই সময়ত তেওঁলোকে ৰাজপথত এগৰাকী ২৪ বছৰীয়া মহিলাক অশালীন মন্তব্য আৰু যৌন নিৰ্যাতন চলোৱাৰ অভিযোগ উত্থাপন হৈছে।
নিৰ্যাতিতাৰ ভাতৃয়ে আৰক্ষীৰ ওচৰত এজাহাৰ দাখিল কৰে। সেই অভিযোগৰ ভিত্তিত অঞ্চলটোৰ চিচিটিভি ফুটেজ পৰীক্ষা কৰা হয়। শনিবাৰে গ্ৰেপ্তাৰ কৰে অভিযুক্ত দুজনক।
আৰক্ষীয়ে জানিবলৈ দিয়া মতে, তেওঁলোকৰ বিৰুদ্ধে ভাৰতীয় দণ্ডবিধিৰ ৭৪, ৭৯, ১১৫ আৰু ৩৫২ ধাৰাত গোচৰ ৰুজু কৰা হৈছে।