অৰ্থনৈতিকভাৱে পিছপৰা শ্ৰেণীৰ বাবে ১০ শতাংশ সংৰক্ষণ ৰাজ্য চৰকাৰৰ
ৰাজ্য চৰকাৰে চৰকাৰী চাকৰিৰ ক্ষেত্ৰত অৰ্থনৈতিকভাৱে পিছপৰা শ্ৰেণীৰ বাবে ১০ শতাংশ সংৰক্ষণৰ সিদ্ধান্ত গ্ৰহণ কৰিছে। ৰাজ্য চৰকাৰৰ সংসদীয় পৰিক্ৰমা মন্ত্ৰী চন্দ্ৰমোহন পাটোৱাৰীয়ে সোমবাৰে অনুষ্ঠিত কেবিনেট বৈঠকৰ পাছতে এই কথা ঘোষণা কৰে।
তদুপৰি, জলসম্পদ বিভাগৰ বাবে চৰকাৰে ৯৫ কোটি ঋণ লোৱাৰ কথা সদৰী কৰি চন্দ্ৰমোহন পাটোৱাৰীয়ে জানিবলৈ দিয়ে যে চৰকাৰে ৰাজ্যখনৰ ৫ লাখ খেতিয়কক ৫ হাজাৰকৈ টকা আগবঢ়াব। মুখ্যমন্ত্ৰীৰ সা-সঁজুলি যোজনাৰ অধীনত এই সাহায্য আগবঢ়াব বুলি তেওঁ জনায়।
আনহাতে, ৰাজ্য চৰকাৰে চাহ বাগিচাৰ শ্ৰমিক কল্যাণ বিষয়াৰ ন্যূনতম দৰমহা ১৫ হাজাৰ টকা ধাৰ্য কৰিছে। তদুপৰি, ‘আসাম টী প্লেনটেশ্যন প্ৰভিডেন্ট ফাণ্ড এণ্ড পেন্সন ফাণ্ড স্কীম’ৰ অধীনত চাহ বাগিচাত চৰকাৰে হাস্পতাল নিৰ্মাণ কৰিব।
চৰকাৰে বাগিচাৰ মহিলাক সুবিধা প্ৰদান কৰাৰ লক্ষ্য স্থিৰ কৰিছে। অটল অমৃত আৰু আয়ুস্মান ভাৰতৰ কাৰ্ডৰ জৰিয়তে হাস্পতালক দিয়া ধনৰ ৰাহি অংশৰ পৰা ২০ শতাংশ ধন চিকিৎসক-নাৰ্চ, ছাফাইকৰ্মীকে ধৰি হাস্পাতলৰ আন আন কৰ্মচাৰীৰ মাজত বিতৰণ কৰিব বুলিও মন্ত্ৰীগৰাকীয়ে জানিবলৈ দিয়ে।
ইপিনে, অগপৰ মিত্ৰতা সন্দৰ্ভতো নিজৰ বক্তৱ্য ৰাখি মন্ত্ৰী পাটোৱাৰীয়ে কয়, ‘’অগপৰ ৩ জন মন্ত্ৰীক বৈঠকলৈ নিমন্ত্ৰণ জনোৱা হৈছিল। তেওঁলোকৰ বাবে এতিয়াও দুৱাৰ খোলা আছে। তিনিওজনে ঘূৰি আহি দায়িত্ব গ্ৰহণ কৰক, চৰকাৰে তেওঁলোকক এতিয়াও বিচাৰে।‘’