নগাঁৱৰ কচলুখোৱাত যোৱা ২২ জানুৱাৰীত সংঘটিত এনকাউন্টাৰৰ ঘটনাৰ পিছৰে পৰা জিলা খনৰ আৰক্ষী অধীক্ষক আনন্দ মিশ্ৰক বদলি কৰাৰ বাবে বিভিন্ন দল-সংগঠনে দাবী জনাই আহিছিল।
শেহতীয়াকৈ অসমৰ অতিৰিক্ত মুখ্য সচিব পবন কুমাৰ বৰঠাকুৰৰ এজনীয়া তদন্ত আয়োগে উক্ত দিনাৰ এনকাউণ্টাৰৰ ঘটনাকলৈ দিয়া প্ৰতিবেদনৰ পিছতে সেই দাবী আৰু অধিক জোৰদাৰ হৈ পৰে।
অৱশেষত জনতাৰ দাবীৰ প্ৰতি সন্মান জনাই অসম চৰকাৰে নগাঁৱৰ বহু বিতৰ্কিত আৰক্ষী অধীক্ষক আনন্দ মিশ্ৰক জিলা খনৰ আৰক্ষী অধীক্ষক পদৰ পৰা অব্যাহতি দি গুৱাহাটীলৈ তলব কৰিছে।
অসম চৰকাৰৰ গৃহ বিভাগে আনন্দ মিশ্ৰক পৰৱৰ্তী নিৰ্দেশ নিদিয়া পৰ্যন্ত গুৱাহাটীস্থ অসম আৰক্ষীৰ মুখ্য কাৰ্যালয়ত কাৰ্য নিৰ্বাহ কৰিবলৈ নিৰ্দেশনা জাৰি কৰিছে। একেদৰে নগাঁৱৰ অতিৰিক্ত আৰক্ষী অধীক্ষক ধ্ৰুৱ বৰাক সাময়িক ভাবে জিলা খনৰ আৰক্ষী অধীক্ষকৰ দায়িত্ব অৰ্পন কৰা হৈছে। আনন্দ মিশ্ৰক নগাঁৱৰ পৰা অপসাৰণ কৰাৰ বিষয়টোক সকলোৱে আদৰণি জনাইছে।
নগাওঁ জিলাৰ কেইবাটাও দল-সংগঠনে আদৰণি জনাইছে। তদুপৰি এই দল-সংগঠন কেইটা নগাঁৱৰ আৰক্ষী অধীক্ষক আনন্দ মিশ্ৰৰ বিৰুদ্ধে সৰব হৈ পৰা পৰিলক্ষিত হয়। ইপিনে তদন্তৰ প্ৰতিবেদন ৰাজহুৱা হোৱাৰ পিছত নগাঁও আৰক্ষী অধীক্ষক আনন্দ মিশ্ৰই কালি সংবাদ মেলত কৈছিল-“তদন্তৰ প্ৰতিবেদনক আমি গ্ৰহণ কৰিছোঁ। এনকাউণ্টাৰৰ লগত জড়িত প্ৰদীপ বণিয়াক তাৎক্ষণিকভাৱে নিলম্বন কৰা হৈছে। কিন্তু আমি লগতে ড্ৰাগছ ব্যৱসায়ী জাকিৰ হুছেইনক কিয় কীৰ্তিকমলে বচাবলৈ গৈছিল তাৰ ওপৰত তদন্ত হোৱাটোও বিচাৰোঁ।”
উল্লেখ্য যে, ২২ জানুৱাৰীত এক ভুৱা এনকাউন্টাৰৰ জৰিয়তে কীৰ্তিকমল বৰা নামৰ প্ৰাক্তন ছাত্ৰনেতা জনক নগাঁৱৰ আৰক্ষীয়ে গুলীয়াই আহত কৰিছিল। নগাঁৱত জনপ্ৰিয় হৈ পৰা আৰক্ষী অধীক্ষক আনন্দ মিশ্ৰৰ বিৰুদ্ধে এই ঘটনাৰ পিছতেই জিলাখনৰ সৰ্বত্ৰে প্ৰতিবাদ হৈছিল। জনপ্ৰিয়তাৰ শীৰ্ষত আৰোহণ কৰা নগাঁৱৰ আৰক্ষী অধীক্ষক আনন্দ মিশ্ৰ নিশাটোৰ ভিতৰতে “খলনায়ক”লৈ পৰ্যবসিত হৈছিল।
