বিগত কিছুবছৰত অসমত হিংসাত্মক ঘটনা কিছু বৃদ্ধি পাবলৈ ধৰিছে। তেনে এক ঘটনা হ’ল ২০১৩ চনত ডিফু চহৰত সংঘটিত ঝংকাৰ শইকীয়াৰ হত্যাকাণ্ড।
উল্লেখযোগ্য যে ২০১৩ চনতে সংঘটিত ঝংকাৰ শইকীয়াৰ হত্যাকাণ্ডৰ ঘটনা সংঘটিত হ’ল যদিও বৰ্তমানলৈকে ঝংকাৰৰ পিতৃ-মাতৃয়ে ন্যায় লাভ কৰিবলৈ সক্ষম হোৱা নাই।
প্ৰাপ্ত তথ্য অনুসৰি ঝংকাৰ শইকীয়াৰ হত্যাকাণ্ডৰ গোচৰটো দ্ৰুত নিষ্পত্তিৰ বাবে ৰাজ্যপালৰ কাৰ্যালয়ৰ পৰা প্ৰেৰণ কৰা এক বিশেষ অধিসূচনাযোগে গোলাঘাটৰ বিশিষ্ট অধিবক্তা দুৰ্গা প্ৰসাদ জয়ছৱালক উক্ত গোচৰৰ বিশেষ লোক অধিবক্তা হিচাবে নিয়োগ কৰিছে।
চলিত বৰ্ষৰ মাৰ্চ মাহৰ পৰা বিচাৰ প্ৰক্ৰিয়া চলি থকা গোচৰটোত অহা ২০ নৱেম্বৰত নৱনিযুক্ত বিশেষ লোক অধিবক্তা গৰাকী উপস্থিত থাকিব বুলি জানিব পৰা গৈছে।
উল্লেখযোগ্য যে পাঁচবছৰৰ পূৰ্বে মাত্ৰ ৩০ টকা অট’ৰিক্সা ভাড়াৰ বাবে ডিফু চহৰৰ মাজমজিয়াত আৰক্ষীৰ সন্মুখতে ঝংকাৰ আৰু তেওঁৰ পিতৃক গণ প্ৰহাৰ কৰাৰ ফলত দুয়োজন গুৰুতৰভাৱে আহত হৈছিল। পিছত সংকটজনক অৱস্থাত ঝংকাৰক চিকিৎসালয়ত ভর্তি কৰা হয় যদিও ১ জুলাইত ঝংকাৰৰ মৃত্যু হয়।
সেইসময়তে উক্ত ঘটনা সংক্ৰান্তত ডিফু আৰক্ষী থানাত ৯৫/১৩ ভাৰতীয় দণ্ডবিধিৰ ২৯৪/৩২৫/৩০২/৩০৭ /১০৯/১৪৭/১৪৮/১৪৯/৩৩৭/৩৩৮/৩৪ধা
আনহাতে এই গোচৰটোত ১৩৯ জন সাক্ষী আছে। কিন্তু এক বৃহৎ পৰিমাণৰ সাক্ষী-বাদী থকাৰ পিছতো ঝংকাৰৰ পিতৃ তথা বৰ্তমান তিতাবৰ সদৰ মহকুমা আদালতৰ অধিবক্তা হৰেন চন্দ্ৰ শইকীয়াই ডিফু আদালতত প্ৰকৃত ন্যায়ৰ পৰা বঞ্চিত হোৱাৰ আশংকা প্ৰকাশ কৰিছে।
তাৰোপৰি ডিফুত সাক্ষ্যদান কৰিবলৈ যোৱাটোৱে এক ভয়ংকৰ কথা বুলি মন্তব্য কৰি অধিবক্তাগৰাকীয়ে পুত্ৰহত্যাৰ ন্যায় লাভৰ বাবে যিকোনো প্ৰকাৰে গোচৰটো নগাঁও অথবা গোলাঘাটলৈ স্থানান্তৰৰ অতি প্ৰয়োজন বুলি উল্লেখ কৰে।
উল্লেখযোগ্য যে তেওঁ এই সংক্ৰান্তত ইতিমধ্যে গুৱাহাটী উচ্চ ন্যায়ালয়ত এক আবেদন দাখিল কৰি থৈছে আৰু গোচৰটোৰ এনে এক কঠিন সন্ধিক্ষনত চৰকাৰৰ তৰফৰ পৰা বিশেষ লোক অধিবক্তাৰ নিযুক্তিক আদৰণি জনাইছে।
ইফালে উক্ত গোচৰৰ বিশেষ দায়িত্ব লাভ কৰি অধিবক্তা দুৰ্গা প্ৰসাদ জয়ছোৱালে এয়া অতিশয় দায়িত্বশীল কাম বুলি উল্লেখ কৰি ঝংকাৰৰ ন্যায়ৰ বাবে যৎপৰোনাস্তি চেষ্টা কৰিব বুলি মন্তব্য কৰিছে।