দক্ষিণ কোৰিয়াত হেলোইন উৎসৱ উদযাপন কৰাৰ সময়তে পদপিষ্ট হৈ কমেও ১৫১ জন লোক নিহত হৈছে। এই মৰ্মান্তিক ঘটনাত আন ডেৰ শতাধিক পুৰুষ আৰু মহিলা আহত হৈছে। ঘটনাটো শনিবাৰে ৰাজধানী চিউলৰ ইটাৱান অঞ্চলত নিশা স্থানীয় সময় অনুসৰি ১০ বাজি ২০ মিনিটত সংঘটিত হয়।
চিউলত হেলোইন উদযাপন কৰিবলৈ হাজাৰ হাজাৰ লোক এটা ঠেক ৰাস্তাত একত্ৰিত হয়। এটা পৰ্যায়ত যেতিয়া এক বিশৃংখল পৰিস্থিতিৰ সৃষ্টি হৈছিল তেতিয়াই হেঁচাঠেলাত এই কৰণ ঘটনাটো ঘটে।
চিউলৰ য়ংচান অগ্নি নিৰ্বাপক বিভাগৰ মুৰব্বী চোই চেয়ং-বমে জনায় যে শনিবাৰে নিশা ইটাৱানৰ বিনোদন জিলাত জনতাৰ ভিৰত হোৱা হেঁচাঠেলাৰ ফলত এই হতাহতৰ ঘটনাটো সংঘটিত হয়। জৰুৰীকালীন উদ্ধাৰকাৰী কৰ্মীয়ে আহতসকলক চিউলৰ চিকিৎসালয়লৈ লৈ যায়। মৃত্যুৰ সংখ্যা আৰু বৃদ্ধি পাব পাৰে।
ধাৰণা কৰা হৈছে যে এটা বৃহৎ সমাৱেশে হেমিল্টন হোটেলৰ ওচৰৰ ঠেক ৰাস্তাটোৰে ঠেলা ঠেলি কৰি আগবাঢ়ি যাবলৈ চেষ্টা কৰাৰ সময়তে বহুলোক তলত পৰি গৈছিল। সেই সময়ত তেওঁলোক পদপিষ্ট হৈ দুৰ্ঘটনাত পতিত হয়।
ইপিনে, ৰাষ্ট্ৰপতি য়ুন চুক-ইয়লে আহতসকলক তাৎক্ষণিকভাৱে প্ৰাথমিক চিকিৎসাৰ নিৰ্দেশ দিছে। ইথেৱানত জৰুৰী কালীন চিকিৎসাৰ উপৰিও তেওঁ বিষয়াসকলক জৰুৰীকালীন বিচনা সুৰক্ষিত কৰিবলৈ নিৰ্দেশ দিছে।
আনহাতে, চিউলৰ মেয়ৰ ওহ চে-হুনে ইউৰোপলৈ ব্যৱসায়িক ভ্ৰমণত থকা অৱস্থাত দুৰ্ঘটনাটোৰ খবৰ শুনি লগে লগে ঘৰলৈ উভতি অহাৰ সিদ্ধান্ত লৈছে।
আৰক্ষী আৰু অগ্নি নিৰ্বাপকসেৱাৰ মতে আহতসকলৰ ভিতৰত কেইবাজনো হৃদৰোগত আক্ৰান্ত ৰোগী আছে। তেওঁলোকৰ মাজৰ কেইবাজনো লোকৰ মৃত্যু হোৱাৰ আশংকা কৰা হৈছে। ইথেৱান হেমিল্টন হোটেলৰ কাষৰ এটা গলিত এতিয়াও শতাধিক মানুহ পৰি আছে।
ইয়াৰ উপৰি ঘটনাস্থলীলৈ প্ৰেৰণ কৰা চিকিৎসাকৰ্মীসকলে প্ৰাথমিক চিকিৎসা দিবলৈ চেষ্টা কৰি আছে। কিছুমান ৰোগীক ওচৰৰ চানচুনহাং বিশ্ববিদ্যালয় চিকিৎসালয়লৈ স্থানান্তৰিত কৰা হৈছে।
