বিনা বেতনে মানৱ সম্পদ গঢ় দি অহা ৰাজ্যৰ ভেন্সাৰ শিক্ষক কৰ্মচাৰীসকলক সাক্ষাতৰ সময় দিও যথা সময়ত উপস্থিত নহল ৰাজ্যিক বিজেপিৰ সভাপতি তথা সৰভোগ সমষ্টিৰ বিধায়ক ৰঞ্জিৎ কুমাৰ দাস।
অসমৰ ভেন্সাৰ শিক্ষানুষ্ঠানৰ শিক্ষক কৰ্মচাৰীৰ সমস্যা সমাধানৰ আশাত শুকুৰবাৰে ৰাজ্যিক বিজেপিৰ সভাপতি তথা সৰভোগ সমষ্টিৰ বিধায়ক ৰঞ্জিৎ কুমাৰ দাসক এখন স্মাৰক পত্ৰ প্ৰদানৰ সিদ্ধান্ত গ্ৰহণ কৰিছিল অসম শিক্ষক কৰ্মচাৰী ঐক্যমঞ্চৰ বৰপেটা জিলা সমিতিয়ে।
ঐক্যমঞ্চৰ প্ৰতিনিধিসকলে যোৱা ১৭ নবেম্বৰত কলহভাঙা গাঁও পঞ্চায়তৰ সভাত সৰভোগৰ বিধায়ক ৰঞ্জিৎ কুমাৰ দাসক লগ ধৰি সাক্ষাতৰ সময় বিচিৰাছিল আৰু সৰভোগৰ বিধায়ক গৰাকীয়ে ২২ নবেম্বৰ শুকুৰবাৰে বৰপেটাৰোডস্থিত গড়কাপ্তানী বিভাগৰ পৰিদৰ্শন বাংলাত দিনৰ ১০ বজাত সাক্ষাতৰ সময় দিছিল।
বিজেপিৰ ৰাজ্যিক সভাপতিগৰাকীৰ সময় অনুসৰি শুকুৰবাৰে দুৰ্ভগীয়া শিক্ষক কৰ্মচাৰী সকলে ৰঞ্জিৎ কুমাৰ দাসক সাক্ষাৎ কৰি স্মাৰকপত্ৰ দিয়াৰ বাবে বৰপেটাৰোডস্থিত গড়কাপ্তানী বিভাগৰ পৰিদৰ্শন বাংলাত উপস্থিত হয়।
কিন্তু শিক্ষক কৰ্মচাৰী সকলৰ প্ৰতিনিধি সকলে আজি পৰিদৰ্শন বাংলাটোত সুদীৰ্ঘ পাঁচ ঘন্টা ধৰি সৰভোগৰ বিধায়ক ৰঞ্জিৎ কুমাৰ দাসক অপেক্ষা কৰে যদিও বিধায়ক গৰাকীয়ে প্ৰতিনিধিৰ দলটোক কোনো খবৰ নিদিয়াকৈ পৰিদৰ্শন বাংলালৈ অহাৰ পৰা বিৰত থাকে৷
আনহাতে, ৰাজ্যিক বিজেপিৰ সভাপতি তথা সৰভোগ সমষ্টিৰ বিধায়ক গৰাকীৰ এনে কাৰ্যক সহজ ভাবে মানি লব পৰা নাই শিক্ষক কৰ্মচাৰীৰ প্ৰতিনিধিৰ দলটোৱে৷
বৰপেটা জিলা শিক্ষক কৰ্মচাৰী ঐক্যমঞ্চই এই সন্দৰ্ভত ভেন্সাৰ শিক্ষানুষ্ঠান প্ৰাদেশিকীকৰণৰ প্ৰতিশ্ৰুতিৰে শাসনলৈ অহা বিজেপি নেতৃত্বাধীন ৰাজ্য চৰকাৰে নিজৰ প্ৰতিশ্ৰুতি ৰক্ষা কৰাত চূড়ান্তভাবে ব্যৰ্থ হৈছে বুলি উল্লেখ কৰে৷
‘‘ৰাজ্যৰ ভেন্সাৰ শিক্ষক কৰ্মচাৰীৰ সমস্যা সমাধান কৰাত চৰকাৰখন যে মুঠেই আগ্ৰহী নহয় তাৰ প্ৰমাণ আজি ৰাজ্যিক বিজেপিৰ সভাপতি গৰাকীয়ে দিলে’’, ঐক্যমঞ্চৰ প্ৰতিনিধি দলটোৱে কয়৷
ভেন্সাৰ শিক্ষক কৰ্মচাৰীক কৰা ব্যৱহাৰৰ কুফল ৰঞ্জিৎ দাসে অতি শীঘ্ৰে লাভ কৰিব বুলিও আক্ষেপেৰে কয় ঐক্যমঞ্চৰ প্ৰতিনিধিসকলে৷
