‘‘ক’লা কোট বাকচত থোৱা আছে টিকত নাপালে কোৰ্টলৈ গৈ ওকালতি কৰিম।’’ সোমবাৰে শোণিতপুৰ জিলাৰ তেজপুৰ বিধানসভা সমষ্টিত এক আধাৰশিলা উন্মোচন কাৰ্য্যসূচীত অংশ লৈ এনেদৰে মন্তব্য কৰে বিজেপিৰ লোকসভাৰ সাংসদ আৰ পি শৰ্মাই।
লোকসভাত দলীয় টিকত লাভ কৰিব নে নকৰে বুলি সাংবাদিকে সোধা এক প্ৰশ্নৰ উত্তৰ দিবলৈ গৈ এনেদৰে মন্তব্য কৰি সাংসদগৰাকীয়ে দলীয় টিকত পালেও কোনো ক্ষতি নাই আৰু নাপালেও কোনো ক্ষতি নাই বুলি উল্লেখ কৰি টিকত লাভৰ ক্ষেত্ৰত সাংসদ গৰাকীও যে নিশ্চিত নহয় তাৰ সংকেত দিয়ে। ৰাজনীতিত কৈ ওকালতিত বহুবেছি টকা আছে বুলিও সাংসদ গৰাকীয়ে সাংবাদিকৰ আগত মন্তব্য কৰে।
আনহাতে, স্বাস্থ্যজনিত কাৰণত দলে বৰ্তমানৰ সাংসদ গৰাকীক লোকসভাৰ প্ৰাৰ্থীত্বৰ টিকত নিদিব পাৰে নেকি বোলা আন এক প্ৰশ্নৰ উত্তৰত আৰ পি শৰ্মাই এতিয়াও ত্ৰিশ বছৰীয়া যুবকে তেওঁক পাঞ্জা আৰু দৌৰা খেলত হৰুৱাব নোৱাৰে বুলি উল্লেখ কৰে। আনহাতে টিকত নাপালেও তেওঁ সদায় তেজপুৰৰ সংসদীয় সমষ্টিৰ জনসাধাৰণৰ হকে ভবিষ্যতে কাম কৰি যাব বুলিও কয়।
উল্লেখযোগ্য যে, সোমবাৰে তেজপুৰ বিধানসভা সমষ্টিৰ অন্তৰ্গত সৰ্বমুঠ ৮১ টা পথৰ আধাৰশিলা উন্মোচন কৰে ৰাজ্যিক বিত্ত আৰু গড়কাপ্তানী মন্ত্ৰী হিমন্ত বিশ্ব শৰ্মাই। শৰ্মাৰ লগতে অনুষ্ঠানটোত উপস্থিত আছিল সাংসদ আৰ পি শৰ্মা।
স্থানীয় বিধায়ক তথা অসম গণ পৰিষদৰ জেষ্ঠ নেতা বৃন্দবন গোস্বামীৰ নামটো মূল ফলকত থকা স্বত্তেও ক’লা ফিটা মাৰি ঢাকি থোৱাক কেন্দ্ৰ কৰি বিতৰ্কৰ সূত্ৰপাত হৈছে অনুষ্ঠানটোত। স্থানীয় ৰাইজে এই ঘটনাটোক বিজেপিৰ ৰাজনৈতিক আক্ৰোশ বুলি অভিহিত কৰি ঘটনাটোক সমালোচনা কৰিছে।
