গুৱাহাটী মহানগৰীত আজি দুপৰীয়া প্ৰায় ১-৩০ বজাত আৰম্ভ হোৱা এজাক প্ৰচণ্ড ধুমুহা-বৰষুণে আতংকময় পৰিৱেশৰ সৃষ্টি কৰে।
মহানগৰখনৰ বিভিন্ন অঞ্চলত ধুমুহাৰ ফলত বিস্তৰ ক্ষতি হোৱাৰ লগতে বাসিন্দাসকলৰ মাজত তীব্ৰ সন্ত্ৰাসৰ সৃষ্টি কৰে। দিচপুৰকে ধৰি গুৱাহাটীৰ বিভিন্ন স্থানত আৰু ইয়াৰ পাৰ্শ্বৱৰ্তী অঞ্চলতো ধুমুহাৰ ফলত ৰাইজ আতংকিত হৈ পৰে।
হঠাতে অহা এই ধুমুহাজাকৰ ফলত মহানগৰীৰ বহু ঘৰ-দুৱাৰ বিনষ্ট হোৱাৰ লগতে বহু গছ-গছনিও ভাগি পৰে।
দিনৰ গুৰুত্বপূৰ্ণ সময়ছোৱাত হঠাতে আৰম্ভ হোৱা ধুমুহাজাকৰ ফলত বিদ্যালয়ৰ পৰা ওভতা ছাত্ৰ-ছাত্ৰী তথা অভিভাৱকসকল এক অবাঞ্চিত পৰিস্থিতিৰ সন্মুখীন হৈ পৰে। তদুপৰি, বিভিন্ন কাৰ্যালয়ৰ কৰ্মচাৰীসকলে ‘লাঞ্চ’ৰ বাবে ওলাই যোৱাৰ সময়তে প্ৰচণ্ড ধূলিৰ ধুমুহাজাকে সকলোকে আতংকিত কৰি তোলে।
বৰ্তমান ধুমুহা-বৰষুণৰ প্ৰাবল্য কমিছে যদিও এতিয়াও শংকা আঁতৰা নাই।
