সোণাপুৰৰ তামুলিকুছিত ডাম্পিং গ্ৰাউণ্ডৰ তীব্ৰ বিৰোধিতা সৰ্ব ভাৰতীয় জনজাতি ছাত্ৰ সন্থা (আইটছা)ৰ
সোণাপুৰ ট্ৰাইবেল বেল্ট ব্লকৰ অধীনত তামুলিকুছিত ডাম্পিং গ্ৰাউণ্ড কৰিবলৈ কোনোপধ্যে এক ইঞ্চিও মাটি এৰি দিয়া নহ’ব।
জিএমচিৰ মইমতালি আৰু কামৰূপ মহানগৰ জিলা প্ৰশাসন তথা অসম চৰকাৰৰ জনতাবিৰোধী কাৰ্যক ধিক্কাৰ দি এইদৰে তীব্ৰ সকীয়নি প্ৰদান কৰিছে অল ইণ্ডিয়া ট্ৰাইবেল ষ্টুডেন্টছ এচচিয়েশ্যন অসম (আইটছা) ৰাজ্যিক শাখাই।
আইটছাৰ ৰাজ্যিক সাধাৰণ সম্পাদক দীপেন দেউৰীয়ে সংবাদ মাধ্যমলৈ প্ৰেৰণ কৰা এক বিবৃতিত ডাম্পিং গ্ৰাউণ্ড বিৰোধিতা কৰি এইদৰে কয়।
বিবৃবিটোত তেওঁ লগতে দাবী কৰি কয় যে বিজেপিয়ে অসমৰ জনজাতিসকলৰ ভূমি অধিকাৰ নিঃশেষ কৰাৰ ষড়যন্ত্ৰস্বৰূপে ‘নেশ্যনেল চলিড ৱেষ্ট মেনেজমেন্ট এক্ট’ আৰু ‘অসম লেণ্ড ৰেভিন্যু ৰেগুলেচন এক্ট’ৰ দশম অধ্যায় সম্পূৰ্ণ ভংগ কৰিছে।
চৰকাৰৰ এই দুই আইন ভংগ কৰা এনে জনবিৰোধী নীতিৰ পৰা দূৰত থাকি মাটি আৱন্টনৰ যি সিদ্ধান্ত সেয়া অতিশীঘ্ৰে বাতিল কৰিবলৈও চৰকাৰক দাবী জনাইছে জনজাতি ছাত্ৰ সন্থাৰ সম্পাদক দীপেন দেউৰীয়ে।
মানৱ সমাজ আৰু জীৱকুলৰ বাবে অতি বিপদজনক ডাম্পিং গ্ৰাউণ্ড স্থাপনৰ বাবে সোণাপুৰৰ যোৰাবাট তামুলিকুছিৰ সলনি অন্য ঠাই বাচনি কৰিবলৈও আহ্বান জনাইছে জনজাতি ছাত্ৰ সন্থা(আইটছা)ই।
জাতি মাটি ভেটি সুৰক্ষাৰ মিথ্যাচাৰৰ শ্ল’গান গাই ফুৰা সৰ্বানন্দ সোণোৱালে পুঁজিপতি বণিয়াৰ স্বাৰ্থত ডাম্পিং গ্ৰাউণ্ড স্থাপনৰ যি অনীতিৰ প্ৰশ্ৰয় লৈছে ইয়াৰ উচিত প্ৰত্তুত্যৰ অসমবাসীয়ে দিবলৈ বাধ্য হ’ব বুলিও সকিয়াই দিছে আইটছাৰ নেতৃবৃন্দই।