তথ্য জনাৰ অধিকাৰ আইন (আৰ টি আই)ৰ এক শেহতীয়া তথ্যৰ পৰা জানিব পৰা গৈছে যে কংগ্ৰেছ দলে ২০১৩ চনৰ ২৬ জুনৰ পৰা নতুন দিল্লীৰ ২৪ আকবৰ ৰোডত থকা তেওঁলোকৰ পুৰণি মুখ্য কাৰ্যালয়টো অবৈধভাৱে দখল কৰি আছে। যোৱা এক দশকৰো অধিক সময় ধৰি চৰকাৰে এই বঙলাটোৰ বাবে দলটোৰ পৰা কোনো ধৰণৰ ভাড়া লাভ কৰা নাই। কেন্দ্ৰীয় চৰকাৰে প্ৰকাশ কৰা মতে, দলটোৱে পৰিশোধ কৰিবলগীয়া ধনৰ পৰিমাণ বৰ্তমান পৰ্যালোচনা কৰি থকা হৈছে আৰু এতিয়ালৈকে সেয়া নিৰ্ধাৰণ কৰা হোৱা নাই।
কেন্দ্ৰীয় গৃহ আৰু নগৰ পৰিক্ৰমা মন্ত্ৰালয়ৰ অধীনৰ সঞ্চালকালয়ে জনাইছে যে দিল্লীৰ লুইটেন্স অঞ্চলত অৱস্থিত ২৪ নম্বৰ বঙলাটো ১৯৯২ চনৰ ৭ আগষ্টত কংগ্ৰেছ দলক আবণ্টন দিয়া হৈছিল। পিছে ২০১৩ চনৰ ২৬ জুনত এই আবণ্টন বাতিল কৰা হয়। চৰকাৰৰ মতে, সেই দিনটোৰ পৰাই বঙলাটো কংগ্ৰেছৰ অবৈধ দখলত আছে। চৰকাৰে এতিয়াও দলটোৰ পৰা কিমান ধন আদায় কৰিবলগীয়া আছে তাৰ হিচাপ উলিয়াবলৈ বাকী আছে বুলি জনাইছে।
আৰ টি আই আবেদনকাৰীগৰাকীয়ে চৰকাৰে বঙলাটো খালী কৰিবলৈ কংগ্ৰেছক দিয়া জাননীৰ প্ৰতিলিপি বিচাৰিছিল যদিও সঞ্চালকালয়ে এই তথ্য দিবলৈ অস্বীকাৰ কৰে। তেওঁলোকে কয় যে এনে নথিপত্ৰসমূহ একেলগে সংগ্ৰহ কৰি ৰখা নহয় আৰু সেইবোৰ গোটাবলৈ গ‘লে চৰকাৰী বিভাগটোৰ বহুত সময় নষ্ট হ’ব। ইয়াৰ আগতে ২০১৮ চনৰ আন এক আৰ টি আইৰ তথ্য অনুসৰি ২০১৭ চনৰ পৰা ২৪ আকবৰ ৰোডৰ অনুজ্ঞাপত্ৰৰ মাচুল প্ৰতিমাহে ৩৯২০ টকা নিৰ্ধাৰণ কৰা হৈছিল। সেই সময়ত কংগ্ৰেছে বঙলাটো নিজৰ হাতত ৰাখিবলৈ চৰকাৰক অনুৰোধ জনাইছিল।
একেখন আৰ টি আই আবেদনতে শাসকীয় ভাৰতীয় জনতা পাৰ্টিৰ (বিজেপি) পুৰণি মুখ্য কাৰ্যালয় ১১ অশোক ৰোডৰ বিষয়েও তথ্য বিচৰা হৈছিল। সঞ্চালকালয়ে জনোৱা মতে, এই বঙলাটো ১৯৮৫ চনৰ ২১ মাৰ্চত বিজেপিক আবণ্টন দিয়া হৈছিল। অৱশ্যে এতিয়া এই সম্পত্তিটো লোকসভাৰ সাংসদসকলৰ আৱাসিক এলেকাৰ অংশ হৈ পৰিছে। সেয়েহে ইয়াৰ ভাড়া সম্পৰ্কীয় তথ্য জানিবলৈ আবেদনখন লোকসভা সচিবালয়লৈ হস্তান্তৰ কৰা হৈছে। চৰকাৰে লগতে জনাইছে যে বিজেপিৰ ফালৰ পৰা চৰকাৰক কিমান ধন আদায় দিবলগীয়া আছে সেয়াও বৰ্তমান পৰ্যালোচনা কৰি থকা হৈছে আৰু এতিয়ালৈকে নিৰ্ধাৰণ কৰা হোৱা নাই। আগৰ এটা আৰ টি আইৰ তথ্য মতে, ১১ অশোক ৰোডৰ ভাড়াও ২০১৭ চনৰ পৰা প্ৰতিমাহে ৩৯২০ টকা নিৰ্ধাৰণ কৰা হৈছিল।
