Subramanian Swamy changes Twitter: বিজেপিৰ সৈতে ব্যৱধান আৰু বৃদ্ধি পালে সুব্ৰমনিয়াম স্বামীৰ। এইবাৰ তেওঁ নিজৰ টুইটাৰৰ বায়’ৰ পৰা বিজেপিৰ নাম অঁতৰাই পেলালে।
বৃহস্পতিবাৰে বিজেপিৰ ৰাষ্ট্ৰীয় কাৰ্যনিৰ্বাহক সমিতিৰ পৰা সুব্ৰমনিয়াম স্বামীৰ নাম বাদ দিয়া হয়। তাৰপাছতে নিজৰ টুইটাৰৰ পৰা বিজেপিৰ নাম বাদ দিয়ে স্বামীয়ে।
স্বামীয়ে নতুন টুইটাৰ বায়’ত নিজৰ পৰিচয় দাঙি ধৰিছে কেবল ৰাজ্যসভাৰ সাংসদ হিচাপে। পূৰ্বে তেওঁ কোন দলৰ পৰা নিৰ্বাচিত হৈছিল সেয়া লিখা আছিল যদিও এতিয়া আৰু নাই।
তেওঁৰ টুইটাৰ বায়’ত লিখা ৰৈছে, ‘ৰাজ্যসভাৰ সাংসদ, প্ৰাক্তন কেবিনেট মন্ত্ৰী, হাৰ্বাডৰ পৰা অৰ্থনীতিত পিএইচডি, অধ্যাপক, যেনে ভাল ব্যৱহাৰ পাম, তেনেকৈয়ে ঘুৰাই দিম।‘
এই সলনিৰ পূৰ্বে তেওঁ টুইটাৰ বায়’ত বিজেপিৰ সাংসদ হিচাপে পৰিচয় দাঙি ধৰিছিল। তদুপৰি, তেওঁ বিজেপিৰ ৰাষ্ট্ৰীয় কাৰ্যনিৰ্বাহক সমিতিত থকাৰ কথাও উল্লেখ কৰিছিল।
সুব্ৰমনিয়াম স্বামী আৰম্ভণিৰে পৰাই প্ৰধানমন্ত্ৰী মোডীৰ কঠোৰ সমালোচক। মোডীৰ অৰ্থনৈতিক নীতি সন্দৰ্ভতো বিৰূপ মন্তব্য কৰিছে তেওঁ।
স্বামীৰ মন্তব্যক লৈ বহু বিতৰ্কৰো সূচনা হৈছিল। কিন্তু ৰাষ্ট্ৰীয় কাৰ্যনিৰ্বাহক সমিতিৰ পৰা বাদ দিয়াৰ পাছত যেন পুনৰ সৰৱ হোৱাৰ বাবে সাজু হৈছে ‘স্বয়ংসেৱক’ স্বামী।
উল্লেখ্য যে নতুন কৃষি আইন তথা উত্তৰ প্ৰদেশৰ লখিমপুৰৰ খেৰিৰ হিংসাত্মক ঘটনাক লৈ কেন্দ্ৰীয় চৰকাৰক সমালোচনা কৰা বৰুণ গান্ধী আৰু মানেকা গান্ধীকো বৃহস্পতিবাৰে নতুনকৈ গঠন কৰা বিজেপিৰ ৰাষ্ট্ৰীয় কাৰ্যনিৰ্বাহক সমিতিৰ পৰা বাদ দিয়া হৈছে।
