ভাৰতীয় ফুটবল দলৰ অধিনায়ক সুনীল ছেত্ৰীয়ে আজি লাভ কৰিছে পিতৃত্বৰ সুখানুভূতি। আজি ছেত্ৰী আৰু তেওঁৰ পত্নী সোনম ভট্টাচাৰ্যৰ দ্বৈত জীৱনলৈ আগমণ ঘটে এটি পুত্ৰ সন্তানৰ। ইতিমধ্যে পৰিয়াল তথা চিকিৎসালয় কৰ্তৃপক্ষই নিশ্চিত কৰিছে এই খবৰ।
পৰিয়ালে লগতে সোনম আৰু নৱজাতক দুয়ো সুস্থ অৱস্থাত আছে বুলি সদৰী কৰিছে। লক্ষণীয়ভাৱে, গৰ্ভাৱস্থাত সোনম ভট্টাচাৰ্যৰ ডেংগুত আক্ৰান্ত হোৱাৰ পিছতে চিন্তিত হৈ পৰিছিল পৰিয়াল। অৱশেষত কোনো অসুবিধাৰ সন্মুখীন নোহোৱাকৈ সন্তান প্ৰসৱ কৰে সোনমে।
উল্লেখ্য যে, বিগত জুন মাহত ইন্টাৰকণ্টিনেণ্টেল কাপত ভানোৱাটোৰ বিৰুদ্ধে গল স্ক’ৰ কৰাৰ পিছতে এই গল উদযাপনৰ সময়ত ছেত্ৰীয়ে প্ৰতীকি ৰূপত পত্নীৰ গৰ্ভধাৰণৰ ঘোষণা কৰিছিল। পৰিধান কৰা জাৰ্চিৰ তললৈ বল সোমোৱাই গেলাৰীত বহি থকা পত্নীলৈ চুম্বন যাচিছিল তাৰকাগৰাকীয়ে।
মেচৰ পিছত এক সাক্ষাৎকাৰত তেওঁ এইদৰে কৰা উদযাপনৰ আঁৰৰ উদ্দেশ্য ঘোষণা কৰিছিল আৰু কৈছিল যে তেওঁলোকৰ দাম্পত্য জীৱনত আগন্তুক এক সন্তানৰ আশা কৰিছে আৰু পত্নীৰ ইচ্ছানুসৰিয়েই তেওঁ এইদৰে এই খবৰ ঘোষণা কৰিছিল।
দীৰ্ঘদিনৰ সম্পৰ্কৰ পিছত যোৱা ২০১৭ চনত বিবাহপাশত আবদ্ধ হৈছিল ছেত্ৰী আৰু সোনম। উল্লেখ্য যে, সোনম ভট্টাচাৰ্য হৈছে দেশৰ কিংবদন্তি ফুটবলাৰ সুব্ৰত ভট্টাচাৰ্যৰ কন্যা।
প্ৰসঙ্গক্ৰমে উল্লেখনীয় যে, ভাৰতীয় ফুটবলৰ জীৱন্ত কিংবদন্তি ৰূপে পৰিগণিত হোৱা সুনীল ছেত্ৰী চলিত বৰ্ষত স্বমহিমাৰে উজলি উঠিছে। দুৰন্ত প্ৰদৰ্শনেৰে দলক সমুখৰ পৰা নেতৃত্ব দি দেশবাসীক চলিত বৰ্ষত ইন্টাৰকণ্টিনেণ্টেল কাপ আৰু ছাফ চেম্পিয়নশ্বিপৰ খিতাপ উপহাৰ দিছে ছেত্ৰীয়ে।
অৱশ্যে সন্তান জন্মৰ বাবে কিছুদিনৰ বাবে ফুটবল জগতৰ পৰা আঁতৰি থাকিব ছেত্ৰী। আৰু এইবাবে থাইলেণ্ডত অনুষ্ঠিত হ’বলগীয়া আগন্তুক কিংছ কাপত তেওঁ অংশগ্ৰহণ কৰিব নোৱাৰিব বুলি ইতিমধ্যে নিশ্চিত কৰিছে প্ৰশিক্ষক ইগ’ৰ ষ্টিমাকে।
অৱশ্যে এছিয়ান গেমছৰ বাবে তেওঁ ভাৰতীয় দলত যোগদান কৰি দলৰ নেতৃত্বৰ গুৰুদায়িত্ব পুনৰ বহন কৰিব বুলি জানিব পৰা গৈছে।
