এন আৰ চিত কেন্দ্ৰৰ ভূমিকা উদঙাই দিলে দেশৰ উচ্চতম ন্যায়ালয়ে
প্ৰধান মন্ত্ৰী নৰেন্দ্ৰ মোদীৰ লগতে কেন্দ্ৰত চৰকাৰ চলোৱা বিজেপিৰ নেতৃত্বই দেশজুৰি দাবী কৰি অহা অসমত এন আৰ চি উন্নীতকৰণৰ কৃতিত্বৰ মঙলবাৰে স্বৰূপ উদঙাই দিয়ে উচ্চতম ন্যায়ালয়ে।
প্ৰথমৰে পৰা কেন্দ্ৰই এন আৰ চিত সহযোগিতা কৰা নাই বোলাৰ লগতে খোদ কেন্দ্ৰীয় গৃহ মন্ত্ৰ্যালয়েই সমগ্ৰ প্ৰক্ৰিয়াটো ধ্বংস কৰিব খুজিছে বুলি মন্তব্য কৰিছে সৰ্বোচ্চ ন্যায়ালয়ে।
“গৃহ মন্ত্ৰ্যালয়ে এন আৰ চিৰ সমগ্ৰ প্ৰক্ৰিয়াটো ধ্বংস কৰিব খুজিছে। প্ৰথমৰে পৰা কেন্দ্ৰীয় চৰকাৰে সহযোগ কৰা নাই। প্ৰতিবাৰেই কিবা নহয় কিবা অজুহাত দেখুৱাই আহিছে,” এন আৰ চি সন্দৰ্ভত মঙলবাৰৰ শুনানিত এই মন্তব্য মুখ্য ন্যায়াধীশ ৰঞ্জন গগৈৰ।
আসন্ন লোকসভা নিৰ্বাচনৰ পৰিপ্ৰেক্ষিতত এন আৰ চিৰ কাম দুসপ্তাহ পিছুৱাই দিবলৈ কেন্দ্ৰীয় গৃহ মন্ত্ৰ্যালয়ে কৰা আবেদনো খাৰিজ কৰিছে ন্যায়াধীশ গগৈ আৰু ন্যাঃ আৰ এফ নৰিমনৰ আদালতে।
কেন্দ্ৰক সকীয়াই দি সৰ্বোচ্চ ন্যায়ালয়ে লগতে পুনৰ ঘোষণা কৰে যে ৩১ জুলায়েই এন আৰ চি সম্পূৰ্ণকৰণৰ চূড়ান্ত দিন আৰু ইয়াক পিছুওৱা নহয়।