আইনৰ ওপৰত আস্থা নাই! এই কাৰণেই যৌন নিৰ্যাতনৰ অভিযোগত অভিযুক্ত এজন লোকক মহিলাসকলেই হত্যা কৰি জ্বলাই দিলে। তেওঁক হত্যা কৰা মহিলাসকল বিভিন্ন সময়ত পুৰুষজনৰ কামনাৰ আৰু যৌন নিৰ্যাতনৰ বলি হোৱাৰ অভিযোগ উত্থাপন হৈছে। অৱশ্যে আৰক্ষীয়ে লোকজনক হত্যা কৰাৰ অভিযোগত ১০জনক গ্ৰেপ্তাৰ কৰিছে। ওড়িশাৰ গজাপতি জিলাত সংঘটিত হৈছে এই ঘটনা।
আৰক্ষীৰ সূত্ৰ অনুসৰি এদল মহিলাই ৬০ বছৰীয়া ব্যক্তিজনক হত্যা কৰে। লোকজনে বিভিন্ন সময়ত তেওঁলোকক দমন আৰু যৌন নিৰ্যাতন চলাইছিল। হত্যা কৰাৰ পিছত তেওঁৰ মৃতদেহতো জুইত জ্বলাই দিয়া হয়। সোমবাৰে ওড়িশা আৰক্ষীয়ে জনোৱা মতে, লোকজনৰ হত্যাকাণ্ডৰ গোচৰত ১০ জন লোকক গ্ৰেপ্তাৰ কৰা হৈছে। গ্ৰেপ্তাৰ হোৱা ৮ গৰাকী মহিলা।
গজপতি জিলাৰ মোহনা থানাৰ বিষয়া বসন্ত ছেঠীয়ে জানিবলৈ দিয়া মতে, লোকজনক বিচাৰি নোপোৱাৰ বাবে পৰিয়ালে এজাহাৰ দাখিল কৰে। নিৰুদ্দেশ হোৱা গোচৰটোৰ তদন্ত কৰি থাকোঁতে আৰক্ষীয়ে গম পায় যে তেওঁক ঘপিয়াই হত্যা কৰা হৈছে। হত্যা কৰাৰ পিছত তেওঁৰ মৃতদেহও জ্বলাই দিয়া হয়।
গাঁওখনৰ পৰা প্ৰায় ২ কিলোমিটাৰ নিলগৰ হাবিখনৰ সমীপৰ এটা পাহাৰৰ পৰা কিছু হাড় আৰু ছাই উদ্ধাৰ কৰা হয়। এই ঘটনাত গাঁওখনৰ এজন ৱাৰ্ড সদস্যকে ধৰি দহজন লোকক গ্ৰেপ্তাৰ কৰা হৈছে।
জানিব পৰা মতে, যোৱা ৩ তাৰিখে হত্যা কৰা হৈছিল লোকজনক। লোকজনে গাঁওখনৰ এগৰাকী ৫২ বছৰীয়া মহিলাক ধৰ্ষণ কৰাৰ অভিযোগ উত্থাপন হৈছে। ইয়াৰ পিছতে মানুহজনৰ দ্বাৰা যৌন নিৰ্যাতনৰ বলি হোৱা গাঁৱৰ মহিলাসকলে নিজৰ মাজতে এখন সভা পাতে। সেই আলোচনাত তেওঁলোকে মানুহজনক হত্যা কৰাৰ সিদ্ধান্ত লয়। শুই থকা অৱস্থাত সেই ৫২ বছৰীয়া বিধৱাগৰাকীয়ে নিজৰ ঘৰলৈ গৈ চোকা অস্ত্ৰৰে ঘপিয়াই হত্যা কৰে। আন মহিলাসকল আৰু আন দুজন পুৰুষে তেওঁক এই কাৰ্য্যত সহায় কৰিছিল।
আৰক্ষীৰ দাবী, ধৃত মহিলাসকলে বিভিন্ন সময়ত লোকজনৰ কামনাৰ বলি হোৱা বুলি জনাইছে। আৰু এই ঘটনাৰ যাতে পুনৰাবৃত্তি নহয় আৰু আন কোনো নাৰী যাতে তেওঁৰ কামনাৰ বলি হ’ব লগা নহয় তাৰ বাবেই তেওঁলোকে এই কাম কৰিলে।
গজপতি জিলাৰ আৰক্ষী অধীক্ষক যতীন্দ্ৰ কুমাৰ পাণ্ডাই কয় যে মহিলা সকল আগতে কেতিয়াও আৰক্ষীৰ ওচৰলৈ সহায়ৰ বাবে অহা নাছিল। লগতে মহিলাসকলে পুৰুষজনৰ বিৰুদ্ধে কোনো এজাহাৰ দাখিল কৰা নাই বুলিও কয়।
