ওদালগুৰি জিলাত বাইক চুৰিৰ ঘটনা বৃদ্ধি পাবলৈ ধৰাৰ সময়তে মঙলবাৰে টংলাত স্থানীয় এজন সন্দেহজনক বাইক চোৰক আটক কৰি আৰক্ষীক গতাই দিয়ে।
প্ৰাপ্ত তথ্য মতে উক্ত যুৱকজনে মঙলবাৰে দিনৰ ভাগত টংলা আৰক্ষীৰ থানাৰ নিচেই সমীপত থকা পূব-টংলা প্ৰাথমিক বিদ্যালয়ৰ চৌহদত ৰখাই থোৱা এখন বাইকৰ ল’ক ভাঙিবলৈ চেষ্টা চলাইছিল।
যুৱকজনৰ সন্দেহজনক চাল-চলন লক্ষ্য কৰি থকা কেইগৰাকীমান ব্যক্তি তেওঁৰফালে আগবাঢ়ি অহাত তেওঁ পলাব খুজিছিল বুলি স্থানীয় লোকে কয়। ধৃত যুৱকজনক মনোৰঞ্জন বৈদ্যকাৰ (২০) বুলি চিনাক্ত কৰা হৈছে।
টংলা আৰক্ষীয়ে বৰ্তমান যুৱকজনক নিজৰ জিম্মাত লৈ সোধা-পোচা চলাই আছে। উল্লেখযোগ্য যে টংলা সাপ্তাহিক বজাৰলৈ অহা লোকসকলে সাধাৰণতে তেওঁলোকৰ বাইকসমূহ পূব-টংলা প্ৰাৰ্থমিক বিদ্যালয়ৰ চৌহদত ৰখাই থয়।
