যোৱা ২২ নবেম্বৰত ডিমৌত সংঘটিত আলফা (স্বা)ৰ আই ই ডি বিস্ফোৰণত দুজনকৈ লোকে প্ৰাণ হেৰুৱাৰ পিছতে আজি নিশা তিনিচুকীয়া জিলাৰ লেখাপানীত সন্দেহযুক্ত উগ্ৰপন্থী আৰু নিৰাপত্তা বাহিনীৰ মাজত এক গুলীয়াগুলীৰ ঘটনা সংঘটিত হোৱাৰ সন্দেহ কৰা হৈছে।
প্ৰাপ্ত তথ্য মতে আজি নিশা প্ৰায় ৭ঃ৩০ বজাত জিলাখনৰ লেখাপানী আৰক্ষী থানাৰ অন্তৰ্গত কঠা কাষৰণি গাঁৱৰ ৰাইজে তিনি জাঁইকৈ গুলীৰ শব্দ শুনা পায়।
ডিমৌৰ বিস্ফোৰণ, তিনিচুকীয়া জিলাৰ জাগুনত অপহৰণ আৰু সোণাৰিত দুটাকৈ অপহৰণ কাণ্ডৰে আগন্তুক পঞ্চায়ত নিৰ্বাচনৰ পূৰ্বে আলফা স্বাধীনে সন্ত্ৰাস সৃষ্টি কৰি থকাৰ সময়তে আজিৰ এই গুলীচালনাৰ শব্দই অঞ্চলবাসীক আতংকিত কৰি তোলে।
উল্লেখযোগ্য যে যোৱা ১৯ নৱেম্বৰত জাগুনৰ শিলভঙা উদ্যোগৰ কৰ্মচাৰী অপূৰ্ব কাকতিক আলফা (স্বা)এ অপহৰণ কৰি নিয়াৰ পিছৰে পৰা অঞ্চলটোত সেনা-আৰক্ষীয়ে অভিযান অব্যাহত ৰাখিছে। আজিও এটা সেনাৰ দলে কঠাকাষৰণি অঞ্চলৈ অভিযান চলাবলৈ গৈছিল।
সেনাৰ দলটোৰ অভিযান কালতেই গুলীৰ শব্দ শুনিবলৈ পোৱা ঘটনাই বিশেষ তাৎপৰ্য্য বহন কৰিছে বুলি গাঁৱৰ একাংশ ৰাইজে মন্তব্য কৰিছে। অৱশ্যে বাতৰি লিখা সময়লৈকে অধিক তথ্য লাভ কৰিব পৰা হোৱা নাই।
