বৃহস্পতিবাৰে গুৱাহাটী ৰাজীৱ ভৱনত ৭৩ সংখ্যক স্বাধীনতা দিৱস উদযাপনত দেখা গ’ল সদ্য নিলম্বিত প্ৰদেশ কংগ্ৰেছৰ সাধাৰণ সম্পাদক দুলু আহমেদক।
সাংবাদিকৰে সৈতে মত বিনিময়ত তেওঁ কয়, ‘মই দলৰ পৰা সাময়িকভাৱে নিলম্বিতহে হৈছো, বহিষ্কাৰ হোৱা নাই।‘
দলৰ পৰা কিয় নিলম্বন কৰা বুলি সোধা প্ৰশ্নৰ উত্তৰত তেওঁ কয়, ‘আমাৰ দলৰ বহু জ্যেষ্ঠ নেতাৰেই দলৰ সৈতে মতানৈক্য হৈছে আৰু নিলম্বনো হৈছে।‘
দলৰ পৰা নিলম্বন হোৱাটো ডাঙৰ কথা নহয় বুলি উল্লেখ কৰি তেওঁ কয়, ‘দলৰ মাজত কিছুমান কথাই যেতিয়া ন্যায় নাপায়, সেইবিলাক ৰাজহুৱাকৈ কোৱা যায়।‘
‘গণতন্ত্ৰত সকলোৰে মতপ্ৰকাশৰ অধিকাৰ আছে। মই কিবা মন্তব্য দিয়াক লৈ দলে সেয়া দল বিৰোধী বুলি ভাবিলেও মই কিন্তু সেয়া দলবিৰোধী ভৱা নাই,’-তেওঁ কয়।
তাৎপৰ্যপূৰ্ণভাৱে, আহমেদে কয় যে বৰ্তমান আদালতে তেওঁৰ নিলম্বনত হস্তক্ষেপ কৰি ইয়াক স্থগিত ৰাখিছে আৰু বৰ্তমানেও তেওঁৰ পদ বাহাল আছে।
‘মই বৰ্তমান দলৰ মজিয়াতে আছো আৰু দলৰ মজিয়াতে থাকিম আৰু দলৰ হৈ কাম কৰি যাম,’-আহমেদে কয়।
আনহাতে, কংগ্ৰেছ দলৰ বহু নেতা বিজেপিলৈ যোৱাৰ সন্দৰ্ভত তেওঁ কয় যে কংগ্ৰেছ দলত বিজেপিৰ কিছুমান এজেন্ট আছিল আৰু সেইবোৰে আজি বিজেপিলৈ ঢাপলি মেলিছে।
এইক্ষেত্ৰত তেওঁ দলৰ প্ৰশাসন কঠোৰ হব লাগে, নহ’লে তৃণমূল কৰ্মীসকল হতাশাত ভূগিব বুলিও মন্তব্য কৰে।
