“দলৰ বিৰোধী মন্তব্য মই কেতিয়াও কৰা নাছিলো। কালি কাৰ্য্যনিৰ্বাহকত গ্ৰহণ কৰা সিদ্ধান্ত বলপূৰ্বকভাৱে লোৱা সিদ্ধান্ত আৰু ইয়াত আত্মপক্ষৰ সমৰ্থনৰ সুবিধা দিয়া হোৱা নাই।” কংগ্ৰেছৰ পৰা সদ্য নিলম্বিত নেতা ৰমেন বৰঠাকুৰে আজি সংবাদ মাধ্যমৰ আগত এইদৰে মন্তব্য কৰে।
তেওঁ লগতে কয়,‘’যিহেতু মই নিখিল ভাৰত কংগ্ৰেছ কমিটি (AICC )ৰ সদস্য, গতিকে অসম প্ৰদেশ কংগ্ৰেছে মোক নিলম্বন কৰিব নোৱাৰে, কিন্তু নিলম্বনৰ প্ৰস্তাৱ ল’ব পাৰে।‘’
প্ৰদেশ কংগ্ৰেছৰ সভাপতি ৰিপুন বৰাৰ প্ৰতি আক্ৰমণাত্মক হৈ পৰা বৰঠাকুৰে কয়, ‘’ৰিপুন বৰা এণ্ড কোম্পানীয়ে মোৰ বিৰুদ্ধে অপপ্ৰচাৰ চলাই সামাজিক মৰ্য্যদা বিনষ্ট কৰিব খুজিছে। ইয়াৰ যোগেদি ৰিপুন বৰাই নিজে দল বিৰোধী কাৰ্য্যত লিপ্ত হৈছে।‘’
শণিবাৰে বৈঠকত গ্ৰহণ কৰা সিদ্ধান্ত অ-সাংবিধানিক, অ-গণতান্ত্ৰিক আৰু ৰিপুন বৰাই পত্নীক সন্তুষ্ট কৰিবলৈ লোৱা এক সিদ্ধান্ত বুলি বিস্ফোৰণ ঘটাই বৰঠাকুৰে মন্তব্য কৰে,’’মোৰ ওপৰত লোৱা সিদ্ধান্ত সম্পূৰ্ণ প্ৰতিশোধমূলক। মই আজিও ক’ম ৰিপুন বৰা নাৰী কেলেংকাৰিৰ সৈতে আৰু বিত্তীয় কেলেংকাৰিৰ সৈতে জড়িত।‘’
‘’তেওঁ মোক টিকটৰ বাবদ এক কোটি টকা বিচাৰিছিল। আটাইতকৈ ডাঙৰ কথা প্ৰদেশ কংগ্ৰেছৰ সম্পাদক সঞ্জু বৰাৰ হতুৱাই মোক টকা বিচাৰিছিল। ইয়াতকৈ ৰিপুন বৰা আৰু কিমান তললৈ যাব পাৰে,’’-ৰিপুন বৰাৰ বিৰুদ্ধে এইদৰে গুৰুতৰ অভিযোগ উত্থাপন কৰে সদ্য নিলম্বিত নেতা ৰমেন বৰঠাকুৰে।
