দিপাৱলীৰ আনন্দত যোৱা দুদিনে মতলীয়া হ’ল দেশ। উচ্চতম ন্যায়ালয়ৰ নিষেধাজ্ঞাকো নেওচি আতচবাজীৰ বিস্ফোৰন ঘটাই আকাশ বতাহ ধোঁৱাময় কৰি তুলিলে আনন্দোল্লাসত মত্ত দেশৰ একাংশ জনসাধাৰণে।
দেৱালীৰ আনন্দত মতলীয়া হৈ ছবিগৃহৰ ভিতৰতে একাংশ লোকে আতচবাজী ফুটুৱাৰ ভাইৰেল দৃশ্যই শেহতীয়াকৈ দেশজুৰি ব্যাপক চাঞ্চল্যৰ সৃষ্টি কৰিছিল। এইবাৰ আতজবাজীৰ বিস্ফোৰণৰ দ্বাৰাই শিৰোনাম দখল কৰিছে এজন যুৱক।
এক আজৱ কায়দাৰে আতচবাজী ফুটাই এই যুৱকজন সম্প্ৰতি আইনী ৰোষত পৰিছে। যুৱকজনে আতচবাজীৰ বিস্ফোৰণৰ বাবে অৱলম্বন কৰা নাছিল কোনো সহজ পন্থা। বৰঞ্চ বাইক ষ্টাণ্ট কৰি আজৱ কায়দাৰে তেওঁ ফুটাইছিল আতচবাজী।
এই ঘটনাৰ এক দৃশ্য এতিয়া ভাইৰেল হৈ পৰিছে। ভাইৰেল ভিডিঅ’টোত বাইকাৰজনে ষ্টাণ্ট প্ৰদৰ্শন কৰি বাইকখনৰ সন্মুখৰ চকা বতাহত উঠাই অলপ দূৰত্ব অতিক্ৰম কৰা দেখিবলৈ পোৱা গৈছে।
বাইকৰ আগচকা এইদৰে শূন্যত দাঙি থোৱা অৱস্থাতে বাইকখনৰ হেডলাইট আৰু সন্মুখৰ নম্বৰ প্লেটত লগোৱা আতচবাজীৰ বিস্ফোৰণ ঘটা এই ভাইৰেল ভিডিঅ’টোত পৰিলক্ষিত হৈছে।
এই ঘটনাটো তামিলনাডুৰ ত্ৰিচি জিলাৰ বুলি জানিব পৰা গৈছে। ভিডিঅ’টো ভাইৰেল হৈ পৰাৰ পিছতে খলকনি তোলে সামাজিক মাধ্যমত। ইয়াৰ পিছতে ভিডিঅ’টোত দেখা পোৱা ইনষ্টাগ্ৰাম পেজ ‘ডেভিল ৰাইডাৰ’ৰ জৰিয়তে পুলিচে সন্ধান চলায় বাইকাৰজনৰ।
প্ৰকাশিত খবৰ অনুসৰি, সম্প্ৰতি পলাতক হৈ থকা বাইকাৰগৰাকীৰ সন্ধান চলাই আছে আৰক্ষীয়ে। গ্ৰেপ্তাৰ কৰিছে তেওঁৰ সহযোগী অজয় নামৰ আন এজন যুৱকক।
