বিৰোধীসকলে কটাক্ষ কৰি বংশবাদৰ কথা কৈছে। কিছুমানে কৈছে পিতৃৰ গুণৰ বাবে পুত্ৰৰ উত্থানৰ কথা। কিন্তু সেই সকলোবোৰ কথাক আওকাণ কৰি তামিলনাডুৰ বৰ্তমানৰ মুখ্যমন্ত্ৰী এম কে ষ্টেলিনে তেওঁৰ পুত্ৰ উদয়নিধিক উপ-মুখ্যমন্ত্ৰী হিচাপে নিযুক্তি দিয়ে। ঠিক ডেৰ দশক পূৰ্বে এম কে ষ্টেলিনক তেওঁৰ পিতৃ প্ৰয়াত এম কে কৰুণানিধিয়ে উপ-মুখ্যমন্ত্ৰী হিচাপে নিযুক্তি দিছিল।
দেওবাৰে বিয়লি তামিলনাডুৰ ৰাজভৱনত উপ-মুখ্যমন্ত্ৰী হিচাপে শপত গ্ৰহণ কৰিব উদয়নিধিয়ে। তেওঁৰ লগত চেন্থিল বালাজীকে ধৰি আন চাৰিজনে মন্ত্ৰী হিচাপে শপত লোৱাৰ কথা। কিন্তু বালাজীয়ে কোনটো মন্ত্ৰালয় লাভ কৰিব সেয়া এতিয়াও স্পষ্ট হোৱা নাই।
ইমানদিনে উদয়নিধি ষ্টেলিনৰ মন্ত্ৰীসভাত ক্ৰীড়া মন্ত্ৰী হিচাপে আছিল। যিহেতু তেওঁ এইবাৰ উপ-মুখ্যমন্ত্ৰী, সেয়েহে ৰাজনৈতিক মহলত ক্ৰীড়া বিভাগ কোনে পায় তাকলৈও কৌতুহলৰ সৃষ্টি হৈছে।
লগতে পঢ়কঃ বাংলাদেশৰ বিৰুদ্ধে টি-২০ শৃংখলাৰ দল ঘোষণা; প্ৰথমবাৰ দেশৰ জাৰ্চিত মায়ংক যাদৱ, আছে ৰিয়ানো
উল্লেখ্য যে ২০২১ চনৰ বিধানসভা নিৰ্বাচনত এটা দশকৰ পাছত পুনৰ তামিলনাডুৰ শাসনভাৰ দখল কৰিলে ডি এম কেয়ে। ষ্টেলিন আৰু উদয়নিধি, পিতৃ-পুত্ৰ উভয়েই নিৰ্বাচনত জয়লাভ কৰে। কিন্তু ক্ষমতালৈ অহাৰ লগে লগে নহয়, প্ৰায় ডেৰ বছৰ পিছত ষ্টেলিনে নিজৰ পুত্ৰক মন্ত্ৰীসভাত স্থান দিছিল।
