বঙাইগাঁৱত কৰ বিভাগৰ অভিযান ,ৰে’লৰে কৰ ফাঁকি দি অনা বৃহৎ পৰিমাণৰ সামগ্ৰী জব্দ

বঙাইগাঁও চহৰৰ নিউ বঙাইগাঁও ৰে’লৱে জংচনত বিক্ৰী কৰ বিভাগে অভিযান চলাই কৰ ফাঁকিৰে অসমত প্ৰৱেশ কৰা বৃহৎ পৰিমাণৰ বস্ত্ৰ, জোতা আদি জব্দ কৰে ৷

জানিব পৰা মতে উজনিমুৱা ক’ভিড স্পেচিয়েল ৰে’লখনেৰে কঢ়িয়াই আনিছিল উক্ত বৃহৎ পৰিমাণৰ সামগ্ৰীখিনি ৷
কিন্তু বিক্ৰী কৰ বিভাগে সামগ্ৰীসমূহ কৰ ফাঁকিৰে কঢ়িয়াই অনাৰ তথ্য লাভ কৰি অভিযান চলায় ৷

অভিযানকালত কৰ বিভাগৰ দলে প্ৰায় ৬০০ বস্তা সামগ্ৰী জব্দ কৰিছে ৷ ইপিনে ৰে’লৱে আৰক্ষীয়ে সংবাদ মাধ্যমক জানিব দিয়া মতে এই সামগ্ৰীখিনি হাওৰাৰ পৰা ৰে’লখনত কঢ়িয়াই আনিছিল ৷ সামগ্ৰীসমূহ ৰাজ্যৰ বিভিন্ন ঠাইলৈ প্ৰেৰণৰ বাবে কঢ়িয়াই অনা হৈছিল ৷

জব্দ কৰা বস্তাসমূহৰ ওপৰত গুৱাহাটী, গোৱালপাৰা, বঙাইগাঁও, লক্ষীমপুৰ, দুধনৈ আদি ঠাইৰ নাম উল্লেখ থকা বুলিও সদৰি কৰে ৷

ইপিনে উত্থাপিত অভিযোগ অনুসৰি শাৰদীয় উৎসৱৰ সময়ত প্ৰতি বছৰে এক চক্ৰই বহিঃ ৰাজ্যৰ পৰা বৃহৎ পৰিমাণৰ বিক্ৰকৰ ফাঁকিৰে ৰে’যোগে এনেদৰে সামগ্ৰী অসমলৈ কঢ়িয়াই আনি ব্যৱসায় কৰি আহিছে ৷ কিন্তু ইয়াৰ ফলত প্ৰতি বছৰে ৰাজ্য চৰকাৰে বৃহৎ পৰিমাণৰ ৰাজহ হেৰুৱাবলীয়া হৈছে ৷

উল্লেখ্য যে জব্দকৃত সামগ্ৰীসমূহ কৰ বিভাগৰ দলে হিচাপ কৰি আছে আৰু কিমান কৰ ফাঁকি দিছে সেইবোৰ পৰীক্ষা কৰি আছে ৷

ইপিনে সামগ্ৰীসমূহ ৰে’লখনত বিভিন্ন ঠাইলৈ বুকিংযোগে অনা হৈছিল বুলিও জানিব পৰা গৈছে ৷

সামগ্ৰীসমূহ জনৈক ৰমেশ আৰু উমেশৰ নামত আহিছিল ৷ এইদৰেই এতিয়া কৰ ফাঁকিৰে একাংশ চলাই গৈছে ৰমৰমীয়া ব্যৱসায় ৷