এগৰাকী মানব সম্পদ গঢ় দিয়া ব্যক্তিৰ সুদীৰ্ঘ দিন ধৰি কৰা সেৱাৰ প্ৰতিদান স্বৰূপে চৰকাৰী ঘৰৰ পৰা এটকাও নোপোৱাকৈ নিজৰ শিক্ষকতা জীৱন সামৰিলে এগৰাকী মহান শিক্ষকে।
ওদালগুৰি জিলাৰ খৈৰাবাৰীৰ অলংবাৰ বড়ো উচ্চতৰ মাধ্যমিক বিদ্যালয়ৰ প্ৰধান শিক্ষক ঋষি ৰাম বড়োই আজি চৰকাৰৰ ঘৰৰ পৰা এটকাও পাৰিশ্ৰমিক লাভ নকৰাকৈ শিক্ষকতা জীৱনৰ পৰা অবসৰ গ্ৰহণ কৰে।
বিদ্যালয়খনৰ পৰিচালনা সমিতিয়ে আয়োজন কৰা বিদায় সভাত ছাত্ৰ-ছাত্ৰী, শিক্ষক, সহকৰ্মী আৰু অঞ্চলটোৰ ভালেসংখ্যক ৰাইজে অংশগ্ৰহণ কৰে। সভাৰ সভাপতিগৰাকীয়ে ভাষণত বড়োৰ মানব সম্পদ গঢ়াৰ প্ৰতি থকা নিৰলস সাধনা, ত্যাগক সমাজৰ বাবে উদাহৰণ বাবে উৎকৃষ্ট উদাহৰণ হিচাপে অভিহিত কৰে।
আনহাতে, বিদায় সভাত বিদ্যালয়খনৰ শিক্ষক আৰু ছাত্ৰ-ছাত্ৰীসকলে বিদায়ী প্ৰধান শিক্ষকগৰাকীক ফুলাম গামোচা, শৰাই, জাপি, আৰ’নাই আৰু কিতাপৰ টোপোলাৰে সাম্বৰ্ধনা জনাই।
ঋষি ৰাম বড়োই সুদীৰ্ঘ ৩৮ বছৰ ধৰি বিদ্যালয়খনত বিনাবেতনে শিক্ষাদান কৰি অভাব অনাতনৰ লগত যুদ্ধ কৰি কৰি অবসৰ গ্ৰহণ কৰে। চৰকাৰে প্ৰতিশ্ৰুতি দিয়াৰ পাছতো ৰাজ্যৰ বিভিন্ন বিদ্যালয়ৰ লগতে অলংবাৰ বড়ো উচ্চতৰ মাধ্যমিক বিদ্যালয়খন প্ৰাদেশীকৰণ নকৰাত খালী হাতেৰে উভতিব লগা হ’ল মানৱ সম্পদ গঢ়াৰ কমাৰশালৰ প্ৰহৰীজন।
উল্লেখযোগ্য যে, চৰকাৰে ৰাজ্যৰ অপ্ৰাদেশীকৃত বিদ্যালয় সমূহ প্ৰাদেশীকৰণৰ কোনো ধৰণৰ ব্যৱস্থা গ্ৰহণ নকৰাৰ ফলত এনেদৰে ভালমানে শিক্ষাগুৰুৱে বিনাবেতনে শিক্ষাদান কৰি অবসৰ গ্ৰহণ কৰিব লগা হৈছে।
