এক চাঞ্চল্যকৰ হত্যাকাণ্ডই জোকাৰি গৈছে লক্ষ্ণৌৰ লগতে সমগ্ৰ দেশকে।
লক্ষ্ণৌৰ ৰে’লৱে কলনীৰ চৰকাৰী আৱাসগৃহত এগৰাকী শীৰ্ষ ৰে’ল বিষয়াৰ নাবালিকা কন্যাই যোৱা নিশা গুলীয়াই হত্যা কৰে নিজৰ মাকৰ লগতে নাবালক ভাতৃকো।
ঘটনাৰ সময়ত ঘৰত উপস্থিত নাছিল হত্যাকাৰী নাবালিকা গৰাকীৰ পিতৃ।
লক্ষ্ণৌৰ আৰক্ষী আয়ুক্ত সুজিত পাণ্ডেই প্ৰকাশ কৰা মতে নাবালিকা গৰাকীৰ পিতৃ ৰাজেশ দত্ত বাজপেয়ী ৰে’ল বোৰ্ডৰ এগৰাকী কাৰ্যবাহী সঞ্চালক।
কৰ্মসূত্ৰে তেওঁ নতুন দিল্লীত থাকে। বিষয়া গৰাকীৰ নাবালিকা কন্যাই মাতৃ আৰু নাবালক ভাতৃক হত্যা কৰাৰ পূৰ্বে বাথৰুমৰ আয়নাত এটা গুলী মাৰে।
আয়না খনত নাবালিকা গৰাকীয়ে ‘মানুহ হৈ থকাৰ মই অযোগ্য’ বুলি লিখাৰ কথাও আৰক্ষীয়ে প্ৰকাশ কৰিছে।
আয়নাত গুলীওৱাৰ পিছতে নাবালিকা গৰাকীয়ে শোৱনি কোঠালৈ আহে আৰু কোনো কথাৰ অৱতাৰণা নকৰাকৈ মাতৃ আৰু ভাতৃক লক্ষ্য কৰি গুলিচালনা কৰে।
ফলত লগে লগে মৃত্যু ঘটে ৪৫ বছৰীয়া মাতৃ মালিনীৰ লগতে ১৭ বছৰীয়া ভাতৃৰ।
গুলীৰ শব্দ শুনা পাই ওচৰ চুবুৰীয়াই আৰক্ষীক খবৰ দিয়ে আৰু আৰক্ষীয়ে ঘটনাস্থলীত উপস্থিত হৈ মাক আৰু ভায়েকক হত্যা কৰা নাবালিকা গৰাকীক আটক কৰে।
আৰক্ষীয়ে ঘটনাস্থলীৰ পৰা এটা .২২ পিষ্টলো জব্দ কৰে। আৰক্ষী আয়ুক্ত পাণ্ডেই প্ৰকাশ কৰা অনুসৰি কি কাৰণত নাবালিকা গৰাকীয়ে মাক আৰু ভায়েকক হত্যা কৰিলে সেয়া এতিয়াও স্পষ্ট হোৱা নাই।
নাবালিকা গৰাকীয়ে কিছুদিন ধৰি হতাশাত ভুগি আছিল বুলি আৰক্ষীয়ে প্ৰকাশ কৰিছে।
