পুৰণি মোহে উক দিছে লালু পুত্ৰক: হাতত বেট লৈ কৰিলে নিৰ্দয় প্ৰহাৰ
বিহাৰৰ প্ৰাক্তন মুখ্যমন্ত্ৰী লালু প্ৰসাদ যাদৱৰ পুত্ৰ তথা বিহাৰ বিধানসভাৰ বিৰোধী দলৰ নেতা তেজস্বী যাদৱে আকৌ এবাৰ নিজৰ পুৰণি মোহৰ প্ৰতি আৱেগৰ টান অনুভৱ কৰিছে। ৰাজনীতিৰ পেছা এৰি এইবাৰ নিজৰ সেই পুৰণি মোহ তথা পেছাত নামিছে তেজস্বী।
ৰাজনীতিৰ পথাৰত ভৰি দিয়াৰ পূৰ্বে এগৰাকী ক্ৰিকেটাৰ হিচাপে আত্মপ্ৰকাশ কৰা তেজস্বী পুনৰ উভতিছে ২২ গজৰ যুঁজলৈ। হাতত বেট লৈ সন্মুখৰ বলাৰক কৰিছে নিৰ্দয় প্ৰহাৰ, তাৰ পিছতে বল হাতত তুলি স্পিন ঘূৰ্ণীৰে শলঠেকত পেলাইছে বেটাৰক।
দেওবাৰে আৰ জে ডি- ৰ নেতা গৰাকীয়ে টুইটাৰত পোষ্ট কৰিছে এই দৃশ্য। অৱশ্যে আনুষ্ঠানিক ক্ৰিকেট যুঁজত নহয়, ঘৰৰ চোতালতহে লালু পুত্ৰই ক্ৰিকেটৰ প্ৰতিভা প্ৰদৰ্শন কৰিছে।
মাতৃ তথা প্ৰাক্তন মুখ্যমন্ত্ৰী ৰাবড়ী দেৱীৰ চৰকাৰী বাসগৃহ চাৰ্কুলাৰ ৰোড বাংলোৰ চৌহদত অৱসৰ বিনোদনৰ বাবেহে হাতত পুনৰ বেট-বল তুলি লয় তেজস্বী যাদৱে। এই সাময়িক বিনোদনৰে এটা চমু ভিডিঅ’ টুইটাৰত পোষ্ট কৰে যাদৱে।
ভিডিঅ’টোত তেজস্বীয়ে লিখিছে, “জীৱনেই হওক বা খেল, জিকিবলৈ সদায় খেলিব লাগিব। আপুনি যিমানে মগজুত পৰিকল্পনা কৰিব, খেলপথাৰত সিমানে অধিক ভাল প্ৰদৰ্শন কৰিব। কেইবাটাও বৰ্ষৰ পিছত পুনৰ হাতত বেট আৰু বল তুলি লোৱাৰ চেষ্টা কৰি আনন্দিত।
“যেতিয়া আপোনাৰ গাড়ী চালক, ৰান্ধনী, চুইপাৰ, মালি আৰু আন পৰিচৰ্যাকাৰী সকল আপোনাৰ প্ৰতিপক্ষ খেলুৱৈ হয় আৰু আপোনাক আঘাত কৰিবলৈ আৰু আউট কৰিবলৈ আগ্ৰহী হয়, তেতিয়া ই অধিক সন্তোষজনক হৈ পৰে।”- টুইটটোত যাদৱে লগতে এইদৰে লিখে।
Life or game, one should always play to win. The more you plan in head, the more you perform on field.
Pleasure to try hands on bat & ball after ages. It becomes more satisfying when driver, cook, sweeper, gardener & care takers are your playmates and keen to hit & bowl you out. pic.twitter.com/ChvK9evzi2
— Tejashwi Yadav (@yadavtejashwi) July 17, 2022
উল্লেখ্য যে ৰাজনীতিত ভৰি দিয়াৰ পূৰ্বে ক্ৰিকেটাৰ হিচাপে কেৰিয়াৰ আৰম্ভ কৰিছিল তেজস্বীয়ে। দিল্লীৰ হৈ তেওঁ জুনিয়ৰ ক্ৰিকেটো খেলিছিল। আনহাতে উদ্বোধনী বৰ্ষৰ ইণ্ডিয়ান প্ৰীমিয়াৰ লীগত দিল্লী ডেয়াৰডেভিলছ দলৰ অংশও আছিল তেজস্বী।
তদুপৰি তেওঁ ঝাৰখণ্ডক প্ৰতিনিধিত্ব কৰিও কেইবাখনো আন্ত:ৰাজ্যিক পৰ্যায়ৰ টূৰ্ণামেণ্ট খেলিছিল। জুনিয়ৰ ক্ৰিকেটত তেজস্বীৰ নামত আছে শতকীয় ইনিংছো।
কিন্তু ক্ৰিকেট কেৰিয়াৰত আশানুৰূপ সফলতা লাভ নকৰাৰ পাছত পিতৃ লালু প্ৰসাদ যাদৱ আৰু মাতৃ ৰাৱড়ী দেৱীৰ পথ অনুসৰণ কৰি তেজস্বীয়ে ৰাজনীতিত প্ৰৱেশ কৰে।
ইফালে শেহতীয়াকৈ বিহাৰ ভ্ৰমণৰ সময়ত প্ৰধানমন্ত্ৰী নৰেন্দ্ৰ মোদীয়ে তেজস্বীক ওজন হ্ৰাস কৰাৰ পৰামৰ্শ দিছিল। প্ৰধানমন্ত্ৰী মোদীৰ এই পৰামৰ্শক তেজস্বীয়ে যথেষ্ট গুৰুত্বসহকাৰে লোৱা বুলি সামাজিক মাধ্যমত সৰস চৰ্চা চলিছে।