ৰাষ্ট্ৰদ্ৰোহৰ অভিযোগত কাৰাৰুদ্ধ হৈ থকা বৰ্ষাশ্ৰী বুঢ়াগোহাঁইৰ পৰীক্ষা সন্দৰ্ভত গুৰুত্বপূৰ্ণ ৰায়দান গোলাঘাট জিলাৰ বিশেষ ন্যায়াধীশৰ আদালতে। আজি শুনানিৰ সময়ত আদালতে বৰ্ষাশ্ৰীৰ পৰীক্ষাৰ বাবে গোলাঘাট জিলা উপায়ুক্তই নিয়োগ কৰা নিৰীক্ষকক খাৰিজ কৰিছে।
লগতে পৰীক্ষা কেন্দ্ৰৰ ভাৰপ্ৰাপ্ত বিষয়াক আগন্তুক পৰীক্ষাসমূহৰ বাবে নতুন নিৰীক্ষক নিযুক্তিৰ বাবে নিৰ্দেশ প্ৰদান কৰিছে আদালতে।
উল্লেখ্য যে বৰ্ষাশ্ৰীয়ে অধ্যয়ন কৰা দেৱীচৰণ বৰুৱা ছোৱালী মহাবিদ্যালয়ৰ অধ্যক্ষগৰাকীয়েই পৰীক্ষা কেন্দ্ৰৰ ভাৰপ্ৰাপ্ত বিষয়া হিচাপে দায়িত্বত আছে।
আজি আদালতে মহাবিদ্যালয়খনৰ অধ্যক্ষক আদালতে তীব্ৰ ভৰ্ৎসনা কৰে। আদালতৰ নিৰ্দেশ উলংঘাৰ অভিযোগত আদালতে দেৱীচৰণ বৰুৱা ছোৱালী মহাবিদ্যালয়ৰ অধ্যক্ষ গৰাকীক গৰিহণা দিয়ে।
স্মৰ্তব্য যে যোৱা ১৫ জুলাইত আদালতে মহাবিদ্যালয়খনৰ অধ্যক্ষকক পৰীক্ষা নিৰীক্ষক নিয়োগ কৰিবলৈ নিৰ্দেশ দিছিল। কিন্তু ইয়াৰ বিপৰীতে নিৰীক্ষক নিয়োগ কৰিছিল গোলাঘাটৰ উপায়ুক্তইহে।
আদালতৰ অনুমতি নোহোৱাকৈ গোলাঘাটৰ উপায়ুক্তই এগৰাকী প্ৰশাসনিক বিষয়াক নিৰীক্ষকৰ দায়িত্ব প্ৰদান কৰিছিল। এই কাৰ্য আদালতক অবমাননাৰ বাদে আন একো নহয় বুলি আজি গোলাঘাট জিলাৰ বিশেষ ন্যায়াধীশৰ আদালতে মন্তব্য কৰে।
আদলাতে লগতে এই কাৰ্যৰ বাব দেৱীচৰণ বৰুৱা ছোৱালী মহাবিদ্যালয়ক কাৰণ দৰ্শোৱাৰ জাননী জাৰি কৰে। অহা ২৫ জুলাইৰ ভিতৰত আদালতক কাৰণ দৰ্শাব লাগিব বুলিও অধ্যক্ষগৰাকীক কঠোৰ নিৰ্দেশ প্ৰদান কৰে।
উল্লেখযোগ্য যে, বিদ্ৰোহী কবিতা লিখি গ্ৰেপ্তাৰ হোৱা বৰ্ষাশ্ৰী বুঢ়াগোহাঁইয়ে কাৰাগাৰত ইতিমধ্যে দুটা মাহ অতিক্ৰম কৰিছে। গণিত বিভাগৰ ছাত্ৰী বৰ্ষাশ্ৰীয়ে কাৰাগাৰৰ ভিতৰতে স্নাতক দ্বিতীয় ষাণ্মাসিকৰ পৰীক্ষাত অৱতীৰ্ণ হৈছে।
১৬ জুলাইত প্ৰথমটো পৰীক্ষা হৈ যোৱাৰ পাছত অহা ২১ জুলাইত দ্বিতীয়টো পৰীক্ষাত অৱতীৰ্ণ হ’ব বৰ্ষাশ্ৰী বুঢ়াগোহাঁই।